Os incendios tamén afectan ao rico espazo natural do bidueiral de Montederramo

En Montederramo (Ourense), parroquia de Paredes, un incendio iniciado ás 04.50 da madrugada do luns --do que tampouco existe estimación da súa dimensión-- afecta o seu bidueiral. Mobilizáronse para a súa extinción un axente, sete brigadas, tres motobombas, dúas pas, un tecnico, dúas unidades técnicas de apoio, cinco helicópteros e catro avións.

Doutra banda, na mesma provincia, permanecen activos os lumes de Chandrexa de Queixa (1.600 hectáreas), parroquia de Requeixo, desde as 15.51 horas venres e Vilariño de Conso (180 hectáreas), parroquia de Mormentelos, desde as 17.30 horas do domingo. Neste lugar xa se produciu outro lume este fin de semana, cunha dimensión de 9,14 hectáreas e extinguido ás 21.30 horas do sábado.

Un incendio en Verín permanece activo desde a mañá do luns na parroquia de Mourazos, con perigo por proximidade a vivendas do núcleo de poboación de Tamagos. En consecuencia, está solicitada a activación da Situación 2 como medida preventiva ante isto, segundo informa a Consellería do Medio Rural. Polo momento, non existe unha estimación da súa dimensión.

Con todo, a Garda Civil informa de que, aínda que o lume está próximo a casas, non hai perigo para os seus veciños. Interveñen, por agora, un técnico, catro axentes, tres brigadas, dúas motobombas, unha pa, tres helicópteros e catro avións.

INCENDIOS ESTABILIZADOS E CONTROLADOS

Mentres, está estabilizado desde as 23.37 horas do domingo o incendio forestal de Maceda (400 hectáreas), parroquia de Castro de Escuadro, que obrigou a desaloxar a veciños, aínda que xa está desactivada a Situación 2 pola proximidade ao núcleo de Teixeira. A Xunta apunta á "clara intencionalidade" por iniciarse en "entre cinco e seis puntos case simultáneos".

Pola súa banda, está igualmente estabilizado, desde as 20.28 horas do domingo, o incendio do municipio coruñés de Monfero, parroquia de Queixeiro, que obrigou a desaloxar o mosteiro de Caaveiro e afecta o parque natural das Fragas do Eume. Queima cinco hectáreas desde o seu inicio na tarde do domingo.

Tamén está estabilizado o lume da Estrada (Pontevedra), parroquia de Souto, desde as 22.10 horas do domingo. Queima unhas 20 hectáreas desde o mediodía do 10 de agosto. Ademais, seguen controlados os lumes de Padrenda (Ourense), parroquia homónima (40 hectáreas), e A Fonsagrada (Lugo), parroquia de Monteseiro, que queima unhas 150 hectáreas desde o pasado martes.

OUTROS INCENDIOS EN OURENSE

Por outra banda, tamén en Ourense, en Vilardevós --onde un gran incendio calcinou preto de 600 hectáreas durante os primeiros días de agosto--, declarouse ás 16.05 horas do luns un novo lume, esta vez na parroquia de Moialde, con máis de 20 hectáreas afectadas.