Dúas das tres universidades galegas manteñen proxectos activos con institucións israelís

Dúas das tres universidades públicas de Galicia manteñen a día de hoxe colaboracións con institucións israelís. En concreto, a Universidade de Santiago de Compostela (USC) ten activos 13 proxectos e a Universidade da Coruña (UDC) participa nun estudo internacional sobre endometriosis, mentres que a Universidade de Vigo (Uvigo) non conserva ningún acordo con entidades deste país. As tres institucións lembran que os convenios vixentes son anteriores a xuño de 2024, cando asumiron un compromiso común de rexeitamento a novas colaboracións con Israel en protesta polo "xenocidio contra o pobo palestino".

No caso da UDC, a colaboración corresponde a un proxecto europeo aprobado pola Comisión Europea en abril de 2024, no que participan 14 institucións, entre elas unha empresa israelí especializada en saúde feminina. Pola súa parte, a USC non detallou o contido dos seus 13 proxectos, aínda que precisou que están en curso ata entre este ano e 2029 e que se desenvolven con socios de diferentes países.

A Uvigo, pola súa banda, confirmou que non ten ningún convenio en vigor con entidades israelís e que recentemente rexeitou a solicitude dun investigador que propoñía un proxecto con participación dese país. O reitorado indicou que, ao analizar a situación, comprobou que non era necesario suspender ningunha colaboración financiada por Europa.

Tanto USC como UDC e Uvigo reiteraron a súa condena ao "xenocidio" en Palestina. No último ano, as tres universidades aprobaron mocións e manifestos en apoio ao pobo palestino, comprometéndose a non iniciar novos proxectos con Israel. A Uvigo ampliou, ademais, a súa estratexia de cooperación para acoller alumnado e profesorado palestino, mentres que a USC condiciona unha posible revisión desta política a que institucións israelís esixan ao seu Estado o cesamento inmediato da violencia.