Aedigal alerta do risco de peche de centros para persoas con discapacidade intelectual

A Asociación Empresarial para a Discapacidade Intelectual e do Desenvolvemento de Galica (Aedigal) advertiu de que "hai un risco real de peche dos centros de atención a persoas con discapacidade intelectual" e reclamou á Xunta unha "resposta inmediata". Así o trasladou nun comunicado aos medios este martes "ante a delicada situación económica que están a atravesar as entidades de discapacidade intelectual con prazas concertadas".

Neste contexto, Aedigal atribúe a situación á "inacción da Consellería de Política Social á hora de revisar o prezo das devanditas prazas" para pacientes con discapacidade intelectual. Por iso, Aedigal subliñou que "manifesta a súa profunda preocupación pola viabilidade dos apoios esenciais ás persoas con discapacidade intelectual e ás súas familias".

Igualmente, denunciou a organización que "a Xunta está a incumprir o principio básico do concerto social, ao non compensar os custos reais da prestación dos servizos, o que supón unha ameaza directa á súa continuidade".

ACTUACIÓNS URXENTES

Ao incidir na necesidade de medidas urxentes, a patronal propuxo dúas liñas acciones: un acompañamento técnico a entidades en risco de insolvencia e a "entrega de chaves á administración autonómica".

Con relación á primeira, prometeu Aedigal que "porá a disposición das entidades que se atopen nunha situación próxima á insolvencia o seu asesoramento especializado". E en paralelo (será a segunda medida), "organizará un acto público no que se realizará unha primeira entrega de chaves das entidades con prazas concertadas á Xunta de Galicia". Segundo avisou, a acción que comeza como unha formalidade á administración, "podería derivar nunha cesión efectiva da xestión dos centros".

Centro da Asociación de Pais ou Titores de Persoas con Discapacidade Intelectual de Lugo (ASPNAIS) | Fonte: DAVID CABEZÓN - Arquivo