Renfe suprime o tren de mercadorías que une Galicia con Euskadi
Fomento alega falta de maquinistas na liña Xove-Ariz. CCOO denuncia que «continúa o proceso de desmantelamento» do transporte de mercadorías por ferrocarril.
Por Galicia Confidencial | Lugo | 13/07/2016 | Actualizada ás 12:35
Renfe suprimiu o servizo de mercadorías que saía acotío do concello lugués de Xove con destino a Ariz (en Biscaia). Este tren circulaba pola rede de ancho métrico —antes FEVE— cargado de aluminio e madeira. Fomento alega falta de maquinistas para deixar sen servizo este tren.
A supresión do tren levará a que se intensifique o transporte por estrada. Deste xeito, os oitenta vagóns semanais traduciranse nuns 150 camións máis polas estradas, co incremento de contaminación, conxestión viaria e maior consumo enerxético, segundo apunta CCOO.
Este sindicato denuncia que, con este paso, «continúa o proceso de desmantelamento» do transporte de mercadorías por ferrocarril, que se suma á recente desaparición do de contedores da Coruña —estación de San Diego— e á supresión do posto de maquinista de mercadorías desa mesma terminal. Denuncia que o servizo cóbrese traendo a diario —en taxi— profesionais desde Monforte de Lemos.
Severino Rodríguez, coordinador do sector ferroviario de CCOO de Galicia, alerta de que a falta de maquinistas está provocando a supresión de «múltiples frecuencias». Esta decisión prexudica «gravemente», di, ás empresas transportistas que investiron neste sistema de transporte intermodal, pero tamén o seu persoal e a carga de traballo dos traballadoras e traballadores de circulación do ADIF.
Desde CCOO critican o abandono do transporte de mercadorías por ferrocarril, que no estado español representa, de media, o 3,8 % do total, mentres que a media europea se sitúa no 15,5 %. Por esta razón, o sindicato esixe un «verdadeiro plan de investimentos» para cambiar a situación.
