Os directivos da clorera Elnosa aseguran que están a facer "esforzos" para quedar na ría de Pontevedra

O conselleiro delegado de CUF-Quimigal, Antonio Mezquita, compareceu este mércores en rolda de prensa para falar da "reconversión" da empresa Electroquímica do Noroeste S.L. asegurando que "queren manter a actividade produtiva e comercial en Pontevedra".

Tres son os pasos que a multinacional portuguesa dará con este propósito: a presentación no Concello de Pontevedra dun borrador do Plan especial de reforma interior (PERI) da fábrica para regularizar por completo a súa situación en Lourizán, a renovación "no último trimestre do ano" da Autorización Ambiental Integrada e tamén a solicitude de prórroga da concesión dos terreos.

O Plan Especial de Reforma Interior (PERI) é un trámite imprescindible para que a fábrica poida acometer o cambio á tecnoloxía de membrana, como esixe a normativa europea, abandonando o uso do mercurio na súa produción.

Este cambio ten un custo estimado de "entre 35 e 40 millóns de euros" e un prazo estimado de dous anos.

O problema é que a documentación presentada por Elnosa "non se axusta ás determinacións do plan xeral", segundo a concelleira de urbanismo, Carmen dá Silva, quen engadiu que a clorera está excluída do amparo supramunicipal da Xunta, como si acontece con Ence.

Segundo o informe municipal o PERI que presentou a fábrica non figura no Plan Xeral de Ordenación Municipal que considera un ámbito único para Ence, Elnosa, a depuradora e Mollabao.

"Urbanisticamente a situación actual imposibilita a súa permanencia", dixo Da Silva. A empresa ten un prazo de 10 días para emendar as deficiencias deste PERI.

Os directivos de CUF estudarán a resposta do concello para continuar con este proceso, xa que descartaron completamente o traslado da electroquímica a outra situación.

Segundo Antonio Mezquita, a "explicación é sinxela": a inversión necesaria para construír unha nova fábrica "duplica o custo" da reconversión da actual. É dicir, sairía "entre 70 e 80 millóns de euros", o que é "inviable economicamente", segundo afirmou o conselleiro delegado de CUF-Quimigal.

"Fixemos o traballo, pero os números non pintan, non saen", declarou Antonio Mezquita.

PRÓRROGA

Respecto á concesión dunha prórroga da concesión por parte do Goberno de España, o conselleiro delegado da multinacional lusa considera que "a prórroga de Ence facilita esta decisión", xa que entende que "non hai razóns para que eles consigan a prórroga da concesión e nós non". Esta tramitación está pendente de que Tribunal Supremo tome unha decisión sobre a caducidade do expediente da concesión.

Neste sentido, Antonio Mezquita sinalou a "dispoñibilidade" da Xunta de Galicia "para oír e falar" con eles, unha interlocución que, segundo din, non atopan no Concello de Pontevedra. "Non desistimos de intentar falar co alcalde, estámolo a intentar", apostilou, non obstante.

Mentres tanto, anunciaron unha serie de accións para abrir a clorera á sociedade como a próxima sinatura dun convenio coa Fundación rías do Sur.

RESPOSTA DO GOBERNO MUNICIPAL DE PONTEVEDRA

O tenente de alcalde e concelleira de urbanismo, Carmen da Silva, asegurou en rolda de prensa que o goberno local "vai seguir traballando en todos os ámbitos" para que "Ence e Elnosa desaparezan da súa actual situación" en Lourizán.

Dá Silva recordou que Elnosa produce cloro e sosa cáustica "nun ámbito urbano", enmarcado na ría de Pontevedra. "Isto non entra dentro dos parámetros que se esixen de localización industrial e nada que se lle pareza", resaltou, "antes de engadir que os veciños non teñen que seguir soportando o castigo de ver como a ría permanece degradada".

Finalmente, recordou ue Elnosa esgotou as moratorias que lle deron para adaptar a súa tecnoloxía "e agora toda a bisbarra ten que aguantar que, como non lle dan os números, ten que permanecer aí".