Aberto o prazo para pedir subvencións para instalacións e equipamentos gandeiros en réxime asociativo

O prazo para pedir subvencións para instalacións e equipamentos en réxime asociativo para gandeiros que ofrece a Xunta xa está aberto, non se pechará ata dentro dun mes e ofrece unha cobertura do 40 por cento do custo, aínda que poderá incrementarse ata un 70 por cento.

O importe máximo que poderá ser concedido ascende a 500.000 euros por explotación integrada, segundo indicou nun comunicado a Consellería de Medio Rural, que financia estas axudas xunto ao Fondo Europeo Agrícola de Desenvolvemento Rural (Feader) no marco do plan de desenvolvemento rural de Galicia 2014-2020.

Ademais de nova maquinaria e instalacións, tamén se poderán subvencionar a compra de terreos e os gastos derivados da redacción dos proxectos que se requiran.

A conselleira de Medio Rural, Ángeles Vázquez, defendeu este martes a importancia destas axudas para permitir aos gandeiros "mellorar" as súas explotacións e "incrementar" a produtividade destas. Explicouno durante unha visita á cooperativa Leira, que agrupa a uns 270 socios con explotacións gandeiras en Paradela e Saviñao (Lugo), así como noutros municipios do sur lucense, como Sarria e Bóveda.

Esta cooperativa dedicada á produción vacúa de carne e leite xurdiu en 2006, tras a fusión doutras dúas e, nos últimos anos, obtivo axudas por valor de case 81.000 euros para mellorar a súa maquinaria, o que supuxo unha inversión total de 475.142 euros.