Por Xurxo Salgado | Lugo | 11/08/2016 | Actualizada ás 08:00
O 25 de setembro haberá eleccións autonómicas. Comicios que poden ser decisivos para manter a Alberto Núñez Feijóo como presidente da Xunta. Por iso, os populares puxeron a súa máquina electoral a pleno rendemento, especialmente, nos municipios do rural, principal fonte de votos do PPdeG. E, precisamente, a 44 concellos, a maioría deles do rural e todos gobernados por este partido, van destinados máis de 2 millóns de euros para asfaltar pistas.
En total serán 48 os concellos incluídos no plan extraordinario de Infraestruturas para a posta en valor de camiños municipais, dotado con 2,8 millóns de euros. Só tres deles están gobernados polo PSdeG (Sobrado, Lourenzá e Pedrafita) e outro, o de Sandiás, polos independentes de Agrelsan (Agrupación de Electores de Sandiás).Precisamente, e pola inesperada e apresurada convocatoria anticipada das eleccións, a sinatura dos convenios con concellos agraciados realizáronse nos dous primeiros días de agosto, nas respectivas delegacións territoriais da Consellería do Medio Rural que é quen impulsa estas axudas.
Segundo fontes consultadas, a inclusión de tres concellos socialistas pode deberse a un erro na base de datos da Xunta. No caso de Sobrado (A Coruña) e Lourenzá (Lugo), esta parece ser a razón. O caso de Pedrafita do Cebreiro (Lugo) pode ser debido a que a obra incluída no concello popular de Folgoso do Courel discorre tamén parcialmente por este concello dos Ancares, polo que precisa conveniarse con ámbolos dous concellos.
218.000 euros para o Concello de Ourense
Na provincia de Ourense, tamén se inclúe o concello de Sandiás, coa alcaldía en mans da Agrelsan, que conta co apoio tácito dos tres edís populares. Precisamente, destaca a importante dotación deste plan extraordinario para o concello de Ourense, que supera os 218.000 euros, sendo a asignación máis significativa de todo o programa.
Con todo, segundo fontes populares, o feito de que sexa a única cidade gobernada polo Partido Popular, non tivo nada que ver para a súa inclusión. Tamén sinalan que a non inclusión de concellos gobernados por nacionalistas se debe á ausencia de necesidades específicas de arranxo e posta en valor da rede viaria municipal nestes municipios.
Xunto a este plan especial da Xunta tamén hai arranxos e melloras en camiños de titularidade municipal, dentro do Plan Marco da Consellería do Medio Rural, cofinanciado con fondos europeos e dos propios concellos. Neste caso, á totalidade dos concellos, independentemente da cor política, puideron optar á este tipo de subvención para a mellora da súa rede viaria, cousa que non sucede con este plan electoral extraordinario.
Axudas por provincias
Dentro deste plan especial, os concellos da provincia da Coruña beneficiaranse dunha achega total de 654.027,54 euros, os da provincia de Lugo de 411.373,67, os a provincia de Ourense de 768.146,18 e os da provincia de Pontevedra de 1.005.722,28 euros.
Curiosamente, durante o bipartito, os populares foron moi críticos coa posibilidade de que o goberno de Touriño aprobara entón un plan semellante antes das eleccións, feito que, finalmente, non se chegou a producir.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.