Rivais para o regreso a Europa
O Celta enfrontarase a Ajax de Amsterdam, Standard de Liexa e Panathinaikos na primeira fase da Europa League, co obxectivo de clasificarse entre os dous primeiros. “Competiremos e intentaremos vencer a todos”, asegura Berizzo, que ve un grupo “moi forte”.
Por gcdeportes | Vigo | 26/08/2016 | Actualizada ás 15:58
Ajax de Amsterdam, os belgas do Standard de Liexa e o Panathinaikos grego. Eses serán os rivais do Celta no seu regreso a Europa dez anos despois. O obxectivo dos celestes, a partir do 15 de setembro, será clasificarse entre os dous primeiros para estar na seguinte fase da competición da Europa League.
O adestrador do Celta, Toto Berizzo, que viviu o sorteo na cervexería Estrella Galicia, novo patrocinador do Celta, valorou a dificultade do grupo G, o que lle tocou ao Celta: “Integramos un grupo muy fuerte. Nos prepararemos, disfrutaremos, competiremos e intentaremos vencer a todos. Ajax y Panathinaikos tienen mucha tradición en la Europa League, pero nosotros no seremos un rival fácil para nadie”.
Un grupo duro, segundo o técnico arxentino, aínda que o Celta evitou a outros rivais complicados como Manchester United, os italianos Roma, Fiorentina e Inter de Milán, ou o Schalke alemán, ademáis de viaxes longas como a San Petersburgo (Zenit).
Berizzo lembrou no Twitter oficial do club a súa etapa como futbolista, na que se enfrontou o Ajax na única participación celeste (2002-03) na Champions: 1-0 en Amsterdam con Berizzo no once e 3-2 en Balaídos, con goles de Milosevic, Vagner e Luccin de penalti, sen o arxentino. “Al ver al Ajax recordé cuando jugué contra ellos con el Celta. Grande europeo. Será un honor intentar vencerles”.
Xa estaba retirado o Toto Berizzo cando o Celta enfrontouse e eliminou o Standard de Liexa na Copa da UEFA 2006-07. En Bélxica gañaron os celestes 0-1 con gol de Gustavo López, e 3-0 en Balaídos con tantos de Fernando Baiano (2) e Canobbio.
O presidente do Celta, Carlos Mouriño, presente no sorteo en Mónaco, tamén ve “un grupo complicado”, pero destacou que a participación en Europa para o Celta é “un premio” para a afección tralo sufrimento de anos aínda recentes.
Os rivais do Celta chegaron de diferente xeito á primeira fase da Europa League: o Ajax de Amsterdam, segundo na pasada Liga holandesa, quedou eliminado da Champions tras perder 4-1 co FC Rostov ruso; o Standard de Liexa acadou o pase tras vencer a campaña pasada a Copa belga e o Panathinaikos grego ven da previa tras eliminar o Broendby danés por un total de 4-1 na eliminatoria.
