Arquitectura Sen Fronteiras presentará este xoves na Coruña un documental sobre o dereito a unha vivenda digna

A ONG galega Arquitectura Sen Fronteiras (ASF) presentará este xoves na Coruña 'O dereito a un techito', un documental rodado en Guatemala sobre o dereito a unha vivenda digna.

A sede do Colexio de Arquitectos da Coruña acollerá este xoves ás 20,00 horas a proxección do documental que mostra o traballo de Arquitectura Sen Fronteiras en Guatemala durante os últimos 18 anos sobre o dereito a unha vivenda digna.

O pasado mes de novembro tres voluntarios da ONGD Agareso (Asociación Galega de Reporteiros Solidarios) desprazáronse até a costa sur de Guatemala, onde traballa ASF, para rodar o documental 'O dereito a un techito'.

A gravación centra a súa atención "non só no traballo de ASF e os seus socios no país, senón no porqué desta situación, contextualizando unha realidade complexa, e apoiando a idea da vivenda non como unha mercadoría, senón como un dereito", segundo explica a entidade galega.

A peza, de 25 minutos, proxectarase este xoves 15 de setembro ás 20,00 horas na sede do Colexio de Arquitectos da Coruña. Tras a proxección terá lugar un coloquio con membros de ASF implicados no desenvolvemento do documental.