Por Galicia Confidencial | Santiago de Compostela | 15/09/2016 | Actualizada ás 14:14
A que se di a maior organización cultural do país, a Mesa pola Normalización, entra en campaña. Faino reclamando explícitamente o voto “polas opcións políticas comprometidas coa reposición da lingua galega”.
O colectivo non cita a que partidos hai que votar, pero é evidente que non respalda ao PP, pois criticamente abertamente -como leva anos facendo- as súas políticas. Así, lémbralles aos conservadores que o chamado decreto do plurilingüsimo “prohibe o galego nas matemáticas, nas ciencias ou na tecnoloxía; ou na administración pública onde está practicamente ausente de organismos como a Axencia Tributaria ou a Seguridade Social”.
Ademais, publicou este vídeo no que, datos en man, detalla o retroceso que está a sufrir a lingua propia:
O futuro do galego tamén depende do voto, argumenta a Mesa. O seu presidente Marcos Maceira declara que “os avances e o desenvolvemento social, económico, político e cultural non son posíbeis de costas á lingua propia”.
A entidade social a favor do galego defende unha batería de 6 medidas concluídas extraidas do Plan Xeral de Normalización da Lingua Galega, aprobado en 2004, na era Fraga, por unanimidade parlamentar. As iniciativas concretas pasan por “a recuperación do papel normalizador da CRTVG, un plan de choque para recuperar o galego no ensino, accións claras e concretas no ámbito das administracións públicas incluíndo xustiza e saúde, os transportes públicos, acordos para a recepción mutua do sinal da Radio Televisión Portuguesa e a TVG, e o condicionamento das axudas públicas á utilización da lingua galega.”
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.