A Asociación Galega de Asperger estrea instalacións en Vigo e ofrecerá novos programas e servizos

A Asociación Galega de Asperger (Asperga) inaugurou este martes as súas novas instalacións en Vigo, nas que ofrecerá novos servizos e programas a persoas con esta síndrome e a súa familia, e que permitirán mellorar a atención especializada que xa presta.

O novo espazo da asociación, no número 14 da rúa Enrique Lorenzo de Teis, ten unha superficie de 150 metros cadrados, que se reparten entre recepción, salas multiúsos, consultas, despachos, sala de espera e baños adaptados.

Estas instalacións permitirán a Asperga ofrecer novos servizos e programas, como o Programa de Desenvolvemento de Habilidades Sociais, un Programa de Desenvolvemento de Habilidades Sociolaborais, un Programa Afectivo-Sexual, ou servizos de Planificación de Axenda e Seguimento Escolar, Terapia Ocupacional, talleres, etc.

A estas actividades hai que sumar outras que xa se ofrecen como o servizo de Diagnóstico e Terapia, e o servizo de Logopedia. Así mesmo, coa colaboración do Concello, os usuarios do centro poderán volver beneficiarse de forma gratuíta da terapia con cans, que se retoma despois do éxito do curso pasado.