Investigado un veciño de Ares (A Coruña) polo abandono de seis cachorros de mastín

Efectivos da Garda Civil de Mugardos investigan un veciño de Ares (A Coruña), de 55 anos, como autor dun delito leve de abandono de animais domésticos na tarde do pasado día 26 de setembro.

Ao parecer, esa tarde, a Policía local de Ares recibiu unha información por parte de dous cidadáns que localizaran nunha zona apartada de Lubre, en Ares, un saco grande que contiña seis cachorros de mastín.

Tras iniciar as indagacións pertinentes, a Garda Civil, en colaboración coa Policía Local de Ares, localizou ao suposto autor dos feitos. O home confesou que o fixera porque non quería máis cans na súa explotación gandeira.

INSPECCIÓN NA SÚA EXPLOTACIÓN

Así mesmo se realizou unha inspección administrativa na mencionada explotación, comunicando á autoridade gobernativa competente 11 posibles infraccións en materia de sanidade animal. Dos feitos constitutivos de infracción penal instruíronse dilixencias que se remitiron ao Xulgado de garda de Ferrol.

Dende a Garda Civil precísase que a parella que achou os cachorros de momento puido atopar un fogar para cinco dos seis exemplares de mastín.