Por gcdeportes | Pontevedra | 17/10/2016 | Actualizada ás 09:06
Ficha técnica
Pontevedra CF 3: Edu; Miguel, Jacobo Trigo, Bruno, Bonilla; Kevin Presa, Álex Fernández; David Añón (Mateu, 56’), Mouriño, Álex González (Abel, 56’) e Mario Barco (Portela, 75’).
CD Lealtad 0: Porrón; Omar, Alberto, Álex Blanco, Keko; Gallego (Álvaro Muñiz, 68’), Llano, Mendi, Jandrín (Camporro, minuto 85); Garrido (Johannesson, minuto 75) e David Grande.
Goles: 1-0: Mateu (minuto 57). 2-0: Jacobo Trigo (64’). 3-0: Miguel (81’).
Árbitro: Domínguez Zapatero (castelán). Amarelas a Miguel, Mario Barco e Abel polo Pontevedra e a Keko polo Lealtad.
Incidencias: estadio municipal de Pasarón ante arredor de 5.500 espectadores. O partido serviu de colofón aos actos polo 75 aniversario da fundación do Pontevedra CF. Cholo, presidente de honra, acompañado por Celdrán e Calleja, integrantes do mítico Hai Que Roelo, fixeron o saque de honra e xogadores de distintas etapas saltaron ao campo no descanso, entre un corredor formado por xogadores dos equipos base, para recibir a ovación da afección. O equipo estreou a camiseta conmemorativa do 75 aniversario, que lucirá de xeito exclusivo durante esta tempada.
Este domingo, 16 de outubro, cumpríanse xusto os 75 anos do coñecido como Pacto das Palmeiras, que simbolizou a fusión do Eiriña e o Alfonso e serviu para a fundación do Pontevedra CF. O equipo granate aproveitou a efeméride para agasallar a súa afección cunha vitoria (3-0 ante o CD Lealtad) que lle serve para meterse nos postos de play-off de ascenso. Os de Luisito levan catro xornadas sen perder e suman 10 dos últimos 12 puntos disputados. Final feliz pois aos actos de celebración do 75 aniversario da fundación do Pontevedra.
Tras protagonizar unha primeira parte espesa e sen apenas ocasións, o Pontevedra reaccionou tralo descanso coa entrada no campo de Abel e Mateu no minuto 56. Non levaba nin un minuto no campo o dianteiro mallorquino cando marcou o 1-0 tras un centro de Miguel. Tan só sete minutos despois, Jacobo Trigo facía o segundo tras un corner. E aínda houbo tempo para un terceiro gol, obra de Miguel no minuto 81. Foi un final feliz a unha xornada para a historia, na que o Pontevedra celebrou as súas vodas de platino.
Racing de Ferrol 1 – Burgos 1: non puido pasar do empate o Racing na Malata ante o pechacancelas, Burgos, que só levaba 2 puntos en oito xornadas. Prosi adiantou aos visitantes no minuto 15 cun lanzamento de falta, e Joselu empatou de penalti para o Racing no minuto 68. Os de Míchel, con 9 puntos en nove xornadas, suman tan só un punto nos últimos tres encontros, con un empate e dúas derrotas.
Arandina 4 – Coruxo 0: non tivo opcións o Coruxo na súa visita ao Arandina e encaixou a maior goleada no que vai de Liga. Jefté marcou os dous primeiros xa antes do descanso (minutos 16 e 33), o equipo vigués quedou con dez pola expulsión de Campillo no minuto 58 e encaixou dous máis antes do remate. O Coruxo suma 10 puntos.
CD Izarra 1 – Boiro 1: puideron sumar os tres puntos os de Fredi Álvarez na súa visita a Estella, pero un protestado penalti no minuto 70 permitiu aos locais igualar o tanto de Marcos Álvarez no primeiro tempo. O CD Boiro, tras dúas xornadas sen gañar, é 16º con 8 puntos.
Caudal 2 – Somozas 0: segue a mala xeira do Somozas, que suma xa sete xornadas sen gañar. Caeu 2-0 na súa visita ao Caudal de Mieres e a súa única vitoria foi na segunda xornada. Dende entón, tan só tres empates en sete xornadas, con catro derrotas.
Celta B 1 – Valladolid B 0: terceira vitoria consecutiva do filial céltico, grazas a un gol de penalti de Borja Iglesias no minuto 68. O Celta B vai terceiro con 20 puntos, a cinco do líder o invicto Racing de Santander e con cinco de vantaxe sobre o quinto clasificado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.