Os libros en galego caen máis dun 25% en cinco anos

A produción editorial galega descendeu en case un cuarto do seu volume total nos últimos cinco anos, segundo os datos dun informe difundido este mércores polo Consello da Cultura Galega (CCG).

O documento, elaborado segundo datos do ISBN, indica que o pasado exercicio editáronse un total de 2.266 libros, 338 menos que en 2014. Estas cifras evidencian unha caída progresiva que sitúa o descenso nun 24,5 por cento no último quinquenio. Unha tendencia que, non obstante, non se reproduce a nivel estatal, onde o número de títulos continúa aumentando.

Por outro lado e observando ao evolución de publicacións dende o ano 2008, o número de libros publicados en galego descendeu un 43,8 por cento que salvo un repunte no ano 2010, supoñen máis de mil títulos menos ata o período actual. Así mesmo, as obras en lingua galega representan un 61,5 por cento do total de libros con ISBN editados en Galicia.

O CCG deu a coñecer estes datos a través do Observatorio da Cultura Galega e con motivo da súa presenza na Feira Internacional do Libro (Liber) en Barcelona.

O informe indica, á súa vez, que a edición en galego está moi orientada "a áreas como Educación e Literatura", rexistrando unha tendencia ascendente en ambos os dous casos.

O incremento "máis notable" deuse nos de carácter educativo, cun aumento do 11 por cento respecto a 2013, ademais de en Literatura ou Historia ou aqueles dirixidos a un publico infantil e xuvenil e as publicacións de ciencias sociais ou humanidades.

En contraposición, rexistrouse unha redución de publicacións en galego no ámbito científico-técnico e de tempo libre.Tamén se reduciron as traducións ao galego no período 2008 e 2014, se ben se produciu un repunte entre os dous últimos anos dese intervalo.

A edición privada supuxo o 94 por cento de toda a produción de libros neste idioma con "grandes oscilacións" segundo o ano. Así mesmo, o 20,1% das obras publicados en 2014 en galego tiñan un prezo que se movía entre os 10 e os 12,5 euros.