Santalices pide que sexa "a lexislatura do respecto institucional" e afondar na participación cidadá

O presidente do Parlamento, Miguel Santalices, declarou constituída a Cámara galega nos seus X Lexislatura cunha apelación, "afondar na participación cidadá" que se impulsou no anterior mandato, e que esta sexa "a lexislatura do respecto institucional".

"É a miña función e por iso velarei", avanzou Santalices unha vez elixida a nova Mesa do Parlamento de Galicia, aos membros da cal pediu "colaboración" para poder desempeñar a súa función. Tamén tivo palabras de agradecemento para os populares Marta Rodríguez Arias e José Manuel Balseiro, fóra do órgano reitor da Cámara neste mandato, e para a socialista Marisol Soneira.

Tras as tensións da pasada lexislatura, evidenciadas sobre todo entre os membros de AGE e o PPdeG, Santalices pediu "seguir afondando no que se fixo ben e que esta sexa a lexislatura do respecto institucional".

Nun breve discurso, tamén abriu "as portas do seu despacho" a todos os membros da Cámara que o necesiten e agradeceu o labor dos funcionarios do Hórreo.