Por Galicia Confidencial | Ferrol | 16/11/2016 | Actualizada ás 11:00
O IES Saturnino Montojo está a realizar dous proxectos de innovación educativa, colaborativos e interdisciplinares para impulsar o coñecemento do galego; Correspondentes xuvenís e Camiños. Os dous están coordinados polo EDLG e contan co apoio da dirección do centro e a implicación de todos os departamentos didácticos.
Son precisamente estes departamentos os que, con estas actividades, conseguen impulsar e dinamizar o galego nos centros escolares. Así, estes proxectos desenvolveranse ao longo de todo o curso. Durante este primeiro trimestre estanse celebrando faladoiros, así como actividades como o recitado; instalación artística co gallo do día contra a violencia de xénero, clubs de lectura, a venda de doces para recadar fondos para una ONG que se ocupe dos refuxiados, a exposición sobre As nosas raíces na emigración ou un concurso de fotografía.
Para o segundo e terceiro trimestre hai programados roteiros polos camiños da contorna para descubrir e pór en valor a paisaxe, concursos literarios, instalación artísticas, elaboración de presentacións e vídeos.
Obradoiro de plurilingüísmo
Precisamente, nun destes obradoiros participou o sociolingüísta indio Anik Nandi, que impartiu unha charla interactiva sobre o plurilingüísmo e a diversidade cultural, comparando a situación da India coa de Galicia. “Foi una actividade que contribuíu de xeito sobresaliente á formación integral do alumnado ao permitirlle achegarse dun xeito ameno e moi efectivo a outras realidades lingüísticas e culturais”, apuntan desde o centro.
O obradoiro consistiu nunha charla interactiva acompañada dunha entretida presentación, un recitado en galego e bengalí e unha entrevista cun grupo máis reducido de rapazas que constitúen o equipo de redacción da revista escolar. Posteriormente impartiu unha sesión formativa ás profesoras.
“Consideramos que a actividade desenvolvida por Anik Nandi supuxo unha achega moi relevante na adquisición tanto da competencia lingüística como da competencia en conciencia e expresións culturais do alumnado”, engaden nun comunicado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.