Por gcdeportes | Vigo | 04/12/2016 | Actualizada ás 15:59
Ficha técnica
Real Betis 3: Antonio Adán; Cejudo, Bruno (Rafa Navarro, 46’), Pezzella, José Carlos, Durmisi; Petros, Donk (Felipe Gutiérrez, 70’), Dani Ceballos; Sanabria (Joaquín, 62’) e Rubén Castro.
RC Celta 3: Rubén Blanco; Roncaglia, Cabral, Fontás, Jonny; Radoja (Orellana, 52’), Marcelo Díaz (Pione Sisto, 77’), Daniel Wass; Tucu Hernández, Bongonda (Rossi, 84’) e Iago Aspas.
Goles: 0-1: Iago Aspas (minuto 15). 1-1: Rubén Castro, de penalti (41’). 2-1: Sanabria (53’). 2-2: Iago Aspas (61’). 3-2: Pezzella (73’). 3-3: Roncaglia (84’).
Árbitro: José Mª Sánchez Martínez (murciano). Expulsou por dobre cartón (25' e 92') o bético Petros. Amarelas a Donk (11’), Sanabria (59’), Felipe Gutiérrez (77’) e Pezzella (89’) no Betis.
Incidencias: partido da 14ª xornada de Primeira disputado no Benito Villamarín ante 27.241 espectadores. Minuto de silencio na memoria das vítimas do accidente do Chapecoense.
Faltou ambición no primeiro tempo para sentenciar co 0-1 no marcador a un Betis perdido no campo. O Celta deixou revivir o rival cos seus erros defensivos, viuse dúas veces por debaixo no marcador e tivo ao final que rescatar un punto cun remate coa testa de Roncaglia nun córner, tralos dous primeiros goles de Iagos Aspas. Catro xornadas sen gañar a domicilio por mor dos 12 goles encaixados. O Celta queda con 21 puntos e deixa escapar unha oportunidade de achegarse aos postos europeos.
Un Betis sen intensidade cedeu o campo e a pelota ao Celta, que asumiu axiña o control do partido. Tocaban e tocaban os celestes buscando achegarse a meta rival, aínda que sen moita verticalidade. Pero os locais non tocaban balón, e Bongonda achegábase á área bética. O tanto celeste víase vir, e chegou no minuto 15: centro do belga que se pasea pola área, chega no segundo pau a Daniel Wass, que volve metelo na área pequena para o remate de Iago Aspas.
O Betis estaba medio morto, e o Celta seguiu mandando pero sen a ambición suficiente para sentenciar o choque. Os de Berizzo limitábanse a deixar pasar os minutos, e os locais pouco a pouco foron espertando. Tras avisar Rubén Castro, erro na área de Fontás, que nunha xogada sen perigo tirouse enriba de Petros. Rubén Castro empatou de penalti.
O Celta acabou mal o primeiro tempo e comezou durmido o segundo, e o Betis saiu enchufado a polo partido. Rubén Blanco rematou ao pau no minuto 48 e, cinco minutos despois, o paraguaio Sanabria fixo o 2-1 ante a pasividade defensiva celeste e tras pase de Rubén Castro. Reapareceu Orellana tras máis dun mes de baixa e asistiu para a carreira de Aspas, que rematou ás mans de Adán. Pero o de Moaña non errou a seguinte e fixo o 2-2 no minuto 61 tras un centro cara atrás dende a liña de fondo de Bongonda.
O partido, de ida e volta, estaba sen control e os béticos, de novo nun erro defensivo celeste, desta volta na marcaxe nun córner, fixeron o 3-2 cun certeiro remate coa testa do arxentino Pezzela. E menos mal que Dani Ceballos errou na área o que puido ter sido o 4-2. Berizzo deu entrada a Pione Sisto por un inoperante Chelo Díaz e o Celta empurrou a polo empate. Roncaglia, tamén coa testa nun córner lanzado dende a dereita por Daniel Wass, firmou o 3-3 definitivo nun choque descontrolado. O xoves, en Grecia co Panathinaikos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.