Unha delegación reivindica o papel da cultura galega en Europa

Unha delegación de 65 integrantes da cultura galega reivindicaron este mércores en Bruxelas que a Unión Europea mostre "respecto" polas "diversidades nacionais" dos estados membro, ao tempo que reclamaron "igualdade de dereitos".

O grupo desprazouse ata Bruxelas a iniciativa da eurodeputada de AGEe Lídia Senra, co obxectivo de "visibilizar a situación na que se atopa a cultura galega" e para expoñer aos membros da Comisión Europea as súas demandas.

Uxía Senlle, Chus Pato e Borja Salcedo leron entre os tres unha declaración sobre a cultura galega elaborada pola delegación, na que critican que a Unión Europea "parece esquecer que todo feito identitario comeza por ser cultural".

"Para iso estamos aquí, para recordar que a cultura galega existe ao lado doutras e que, por esquecemento, ignorancia ou desinterese, está sendo agredida, como está sendo agredida a idea dunha Europa xusta e solidaria, socialmente diversa e culturalmente equitativa," dixeron.

Así, Chus Pato denunciou o "constante baleirado político e económico que padecen as culturas europeas na propia Europa", o que ven un "desprezo" cara á cultura galega.

Intervención da eurodeputada galega

Do mesmo modo, Lídia Senra acusou o presidente da Xunta, Alberto Núñez Feijóo, de "facer leis contra o galego" e de aplicar "políticas de austeridade que van contra a cultura galega".

"Tampouco as institucións da UE están facendo nada para contribuír ao florecemento das diferentes culturas dos estados membro e ao respecto das diversidades nacionais", engadiu, "porque esta UE está construída baseándose nos Estados-nación e contra os pobos", concluíu.

Finalmente, Senra mostrou a súa intención de contribuír coas xornadas sobre cultura galega que comezaron este mércores no Parlamento Europeo á visibilización deste sector, así como a reivindicar "o papel das persoas traballadoras" da cultura, o seu "dereito a vivir da súa actividade" e o dereito do pobo a "acceder á cultura".