Presentado en Madrid o poemario 'Sacar a bailar', da autora coruñesa Rosalía Fernández Rial

A Delegación da Xunta de Galicia en Madrid-Casa de Galicia acolleu este xoves a presentación do poemario 'Sacar a bailar', en edición bilingüe, galego e castelán, de Sial-Pigmalión, no que a autora coruñesa Rosalía Fernández Rial (Carballo) reúne poesía creada entre 2009 e 2016.

Na presentación do libro interviñeron, ademais da autora, o actor e escritor Nancho Novo; o profesor, crítico literario e poeta Vicente Araguas; o editor Basilio Rodríguez Cañada e, en representación do delegado da Xunta de Galicia en Madrid e director da Casa, José Ramón Ónega López, o coordinador de Actividades Culturais da entidade, Ramón Jiménez.

Jiménez observou que a obra conta con prólogo de Montse Pena Presa e cuberta de Xiana Lastra Pernas e explicou que Rosalía Fernández Rial "é, ademais de poeta, dramaturga, actriz performer, impulsora de diversos proxectos de alento musical, así como profesora e investigadora en didáctica das linguas; é dicir toda unha artista multidisciplinar".

Novo declarou que Fernández Rial "pertence a unha xeración" que lle produce "admiración, e mesmo estupefacción, polo que sabe, polo que sente e polo que se compromete" e afirmou que a autora "consegue facer poética filosófica e filosofía poética".

O actor finalizou a súa intervención coa lectura de dous poemas do libro "Sacar a bailar", o título da cal, dixo, recordáballe as verbenas dos pobos.

Rodríguez Cañada opinou que Rosalía Fernández Rial entende a poesía "como un todo que supera o escrito e se estende cara a outros xéneros". Como Jiménez, recordou que a autora non solo é poeta senón tamén dramaturga, actriz, impulsora de varios proxectos musicais e profesora e investigadora en didáctica das linguas, para concluír que "todas estas facetas se entrecruzan, creando unha poética híbrida, heteroxénea, singular".

Araguas cualificou de "considerables" tanto a obra como á autora. Valorou que o libro é "compendio dunha obra poética en marcha, progreso e, aínda, progresión". "Rosalía Fernández Rial, logo de cinco libros de poemas estupendos pode considerarse bastante máis que unha poeta emerxente. Eu chamaríalle poeta que avanza, que nada, polo mar proceloso da poética galega, tan transitado por mulleres poetas espléndidas, con movementos vigorosos e harmónicos", expuxo, engadindo que a súa obra mostra "unha autora que ama a música e o teatro e exerce de *performer* nun labirinto de espellos".

Segundo a propia autora, ''Sacar a bailar'' supón un tránsito da reflexión lírica á acción poética. "Implica pensar cos músculos e materializar os paradigmas verbais: amar dende os pés, falar entre mans, converterse en convite. 'Sacar a bailar' é ser o convite mesmo, en movemento, personificado", segundo dixo.