Manifestación en defensa do lobo

“Esta especie emblemática séguese a desangrar, e a necesidade de reclamar a súa protección dende a rúa é máis urxente se cadra”, argumentan os organizadores. En Galicia estanse a autorizar batidas e, como denunciou este vídeo publicado por ADEGA, ás veces en zonas nas que os cazadores xa mataron exemplares.

Verdegaia denuncia que “as autoridades fomentan auténticas campañas de exterminio, mentres o negocio da morte do lobo mantense para diversión dunha elite e para enriquecemento, a miúdo ilegal, dos tratantes da morte da fauna”.  

Na súa opinión, esta continua matanza impide que o lobo alcance un estado de conservación favorable (esixido pola normativa europea) na maior parte do territorio que se lle arrebatou, pero tamén impide o mantemento dun modelo de hábitat rural sostible e respectuoso co seu medio, e mesmo a extensión de novas alternativas económicas baseadas na posta en valor dese medio ambiente dende o punto de vista agrícola mais tamén no tocante ao turismo de natureza.