Castilla-León, interesada no sistema de investigación universitaria de Galicia
O conselleiro de Educación da Xunta de Castilla-León, Fernando Rey, acompañado polo seu homólogo galego, Román Rodríguez, realizou este martes un percorrido polo Cimus (Centro de Investigación en Medicamento Molecular e Enfermidades Crónicas) da USC (Universidade de Santiago de Compostela).
Por E.P. | SANTIAGO DE COMPOSTELA | 14/03/2017 | Actualizada ás 18:52
Tras esta visita, que respondía o interese da comunidade polo sistema de investigación universitaria de Galicia, Fernando Rey mostrouse "admirado" por "como se están facendo as cousas".
Así mesmo, o responsable de Educación de Castilla-León confesou que "queren mellorar" na área investigadora e que por iso veu a Galicia, "para ver que se está facendo de bo" e "coñecelo de primeira man". Seguidamente, subliñou a "solidez" e "peculiaridade" do sistema de investigación galego.
Finalmente, Fernando Rey recoñeceu levar "moi boas ideas" que, asegurou, "tentará adaptar logo ao seu sistema". No entanto, admitiu que "non será fácil porque cada comunidade teñen a súa propia evolución e a súa propia cultura".
Nesta visita ao centro de referencia, tamén estiveron presentes o secretario xeral de Universidades, José Alberto Díez de Castro; a vicerreitora de Investigación e Innovación da USC, Isabel Rodríguez-Moldes; a coordinadora do grupo de investigación BioFarma, Mabel Loza; e dous 'starting grant' que traballan no centro, Rubén Nogueira e Miguel Pérez.
CINCO CENTROS DE INVESTIGACIÓN SINGULARES
Tal e como se explicou nesta xornada, Galicia conta con cinco centros de investigación singulares, entre eles o Cimus, e dúas agrupacións estratéxicas consolidas.
En concreto, os outros centros son o Citic, Universidade da Coruña; o Ciqus, da USC; e o Cinbio e o Ecimat, ambos da Universidade de Vigo. As agrupacións estratéxicas son o Citius, da USC, e o AtlantTIC, da universidade viguesa.
Para recoñecer o esforzo realizado por estes centros, sinalou Román Rodríguez, a Xunta creou unha liña de apoio económico de máis de 13 millóns de euros ata 2019 para garantir a estabilidade financeira dos máis de 700 científicos que traballan neles.
