A Xunta e a Cemma renovan o seu compromiso para a asistencia e recuperación de réptiles e mamíferos mariños varados

A Xunta de Galicia renova o compromiso acadado coa Coordinadora para o Estudo dos Mamíferos Mariños (Cemma) para a asistencia e recuperación deste grupo de animais que, con frecuencia, varan no litoral de Galicia.

Segundo indicou o Goberno galego nun comunicado, a Consellería de Medio Ambiente destinará este ano 40.000 euros para avanzar coas accións que, de forma conxunta, viñan desenvolvendo para garantir o coidado e conservación dos réptiles e mamíferos mariños.

Así se puxo de manifesto no convenio de colaboración que a Xunta e a coordinadora renovaron recentemente.

En liñas xerais, o convenio propón actuacións centradas na comunicación e detección de episodios de varamientos de tartarugas e mamíferos mariños na costa galega, a prestación de coidados e primeiros auxilios aos exemplares vivos, así como o seu tratamento veterinario, hospitalización e alimentación.

Así mesmo, céntrase na identificación das causas da morte nos casos que proceda. E é que cabe destacar que moitos destes animais están incluídos na listaxe de especies en réxime de protección especial recollido no catálogo de especies ameazadas.

Precisamente, unha cría de lobo mariño á que se lle prestou asistencia en base a este convenio de colaboración entre Xunta e Cemma, Luceiro, iniciou este sábado o seu regreso ao mar tras un período de recuperación: primeiro no centro da coordinadora, en Nigrán (Pontevedra), e posteriormente no Instituto Galego de Estudos de Acuicultura, na Illa de Arousa.