Camila Alonso, campioa Iberoamericana

Camila Alonso (Tríatlon Ferrol) revalidou este domingo en Montevideo (Uruguai) o título de campioa Iberoamericana de tríatlon, nunha proba disputada sobre distancia esprinte e que controlou de principio a fin a ferrolá. En categoría masculina, o compostelán Antón Ruanova, que agora compite por Brasil, foi cuarto e Uxío Abuín (Olímpico de Vedra) rematou na sétima posición.

A gran alegría da xornada chegou da man de Camila Alonso. A triatleta do Grupo de alto rendemento do CGTD (Centro Galego de Tecnificación Deportiva) estivo sempre moi ben colocada. Rematou os 750 metros da natación –que se fixo sen neopreno- na terceira posición, a pouco máis de dez segundos da brasileira Vittoria Lopes.

No ciclismo, estivo en cabeza durante os 20 quilómetros, xunto a Lopes, e lograron unha vantaxe de máis dun minuto sobre o grupo principal na chegada á T2. Así, todo se decidiu na carreira a pé, onde a galega foi moi superior á brasileira e puido gozar na súa chegada en solitario á meta, saudando ao público, cun tempo de 1h:02:30. Emoción na loita polos outros postos de podio, que se decidiu ao esprinte e na foto-finish. Segunda foi a mexicana Adriana Barraza (1h:03:07), mentres que a ecuatoriana Elizabeth Bravo acadou a terceira praza co mesmo tempo.

Posteriormente celebrouse a proba masculina, na que Uxío Abuín comezou moi ben colocado, ao saír da auga na terceira posición. Pero na bicicleta perdeu uns segundos preciosos, que o deixaron un pouco descolgado na T2. E na carreira a pé non puido remontar, polo que finalizou na sétima posición cun tempo de 58:02: Mentres, o compostelán Antón Ruanova, que agora compite con licenza de Brasil, foi cuarto (57:52), a só sete segundos do podio. O título foi para o brasileiro Manoel Messias cun tempo de 57:20.