Apadriña ou amadriña unha árbore de Xinzo para evitar que a corten
Xunta e concello teñen previsto tallar máis de medio cento de árbores dunha avenida, moitas delas centenarias.
Por Galicia Confidencial | Xinzo | 18/04/2017 | Actualizada ás 09:15
As árbores da Avenida de Celanova da vila de Xinzo da Limia precisan de axuda para a súa protección. Por iso, a Plataforma Amig@s das Arbores da Limia organiza unha andaina solidaria e apadriñamento/amadriñamento das árbores desta avenida ante a posibilidade de que moitas delas sexan cortadas, a pesar de ser centenarias.
O pasado 21 de marzo (Día da Árbore) o alcalde de Xinzo maila Conselleira de Infraestruturas e Vivenda da Xunta de Galicia presentaron o proxecto de arranxo da avenida e a primeira medida consiste en eliminar 56 árbores e cambialas por outro tipo de vexetación. Unha medida que non comparten desde esta plataforma.
Por iso, decidiron organizar unha acción protesta que terá lugar o vindeiro 23 de abril cunha andaina pola Vía da Prata-Camiño Mozarabe dende Viladerrei a Xinzo da Limia. As persoas interesadas tamén poderán apadriñar ou amadriñar unha destas árbores.
Durante a xornada tamén haberá actividades para os máis pequenos como un xogo de orientación-cartografía con xogo de pistas. Ademais, terá lugar un sorteo de agasallos ao remate da xornada e algunha que outra sorpresa máis.
