VIGO | 20/04/2017 | Actualizada ás 17:23 por EUROPA PRESS
Asociacións profesionais do sector artístico español criticaron a "absoluta opacidade e falta de transparencia" das institucións no relativo ao Museo de Arte Contemporánea de Vigo, e esixiron que se garanta dotación económica para asegurar "a continuidade das súas actividades" e "pór freo á precariedade dos traballadores".
Así o trasladaron nun comunicado conxunto asinado pola Asociación de Directores de Arte Contemporánea de España, o Consello de Críticos de Artes Visuais, o Consorcio de Galerías, a Federación Estatal de Asociacións de Xestores Culturais, o Instituto de Arte Contemporánea, Mulleres nas Artes Visuais e a Unión de Asociacións de Artistas de España.
Neste escrito, ademais de incidir en que "resulta prioritario resolver o problema da baixa dotación orzamentaria que fai case imposible a viabilidade económica do Marco", estas asociacións manifestaron que é "urxente" iniciar a selección da nova dirección, mediante un "concurso público, aberto e transparente", tras a renuncia do ata agora director, Iñaki Martínez Antelo.
Estas entidades esixiron que leve acabo un proceso "que garanta a independencia do proxecto ante as inxerencias do poder político, e o funcionamento democrático e participativo dos equipamentos culturais".
"Non podemos permitir que os enfrontamentos partidistas acaben liquidando un proxecto fundamental para a actividade artística e cultural da cidade", apostilaron, insistindo en están abertas "á colaboración e o diálogo para achegar solucións".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.