En Marea esixe recuperar o programa 'O Agro' da TVG, cuxa supresión levará ao Parlamento de Galicia

En Marea esixiu recuperar o "programa de servizo público" 'O Agro' na grella da Televisión de Galicia (TVG) e avanzou que levará a súa supresión á comisión de seguimento da CRTVG que acolle a Cámara galega.

Nun comunicado, o partido instrumental explicou que con esta medida busca coñecer os motivos polos que a Consellería do Medio Rural "decide recortar nun 75%" o financiamento que destinaba desde 1991 a este programa.

Ademais, tamén se dirixe á dirección da Corporación Radio Televisión de Galicia para que aclare "se vai suprimir definitivamente o programa, os motivos para non asumilo como espazo de produción propia e se está prevista a posta en marcha doutro programa de formato e contidos similares".

"Non é comprensible que a televisión pública que pagamos todas as galegas e galegos retire da grella un programa que emite unha información esencial sobre un sector produtivo estratéxico para o noso país", indicou.