Galicia, segunda autonomía con máis afogados no que levamos de ano

Un total de 111 persoas faleceron afogadas durante o primeiro cuadrimestre de 2017 en España e delas, o 70 por cento eran españolas e o resto doutras nacionalidades, segundo informou este martes o Consejo Superior de Deportes (CSD). Galicia foi a segunda autonomía con máis vítimas neste período, con 22 falecidos.

Así, o informe de afogamentos da Real Federación Española de Salvamento y Socorrismo (RFESS), do CSD, sinala que do total de vítimas, 97 foron homes (87%) e 14 mulleres (13%), mentres que en función da instalación, 48 dos falecidos morreron afogados en praias, 17 en ríos, 4 en piscinas e descoñécese o lugar en que se afogaron outras 42 vítimas. En total, tiñan nese momento algún socorrista vixiando nun 96 por cento dos casos.

Por meses, xaneiro foi o mes máis tráxico, con 34 falecidos (30%), seguido de abril, con 31 mortos (27,9%), marzo, con 29 afogados (26,1%) e febreiro, con 17 vítimas (15,3%).

En canto aos grupos de idade, os máis propensos a sufrir un afogamento teñen entre 35 e 75 anos e desta franxa, con 19 mortes (17,1%) son os que contan entre 55 a 64 anos. Con 17 afectados está a franxa de vítimas con idades de entre 35 e 44 anos e, en terceiro lugar, con 16 afogados, os que teñen entre 65 e 74 anos.

No primeiro cuadrimestre de 2017 faleceron dous menores de entre 0 e dous anos de idade, mentres que non morreu ningún neno de entre 4 e 10 anos.

Por último, por comunidades autónomas, Canarias é a máis afectada, con 27 dos afogados. A esta séguenlle Galicia, con 22; Andalucía, con 21; Cantabria, con 10 vítimas; Cataluña e Comunidade Valenciana, con 7 falecidos; Murcia, 5 mortos; Baleares, con 4; Castela e León, con 3 vítimas; Aragón, con 2 falecidos e Castela-A Mancha e País Vasco cun afogado respectivamente.