Opel España comeza a fabricar o Crossland X, exemplo da alianza con PSA

A factoría de Opel España en Figueruelas (Zaragoza) comezou este martes a producir o novo modelo Crossland X, un exemplo da alianza co grupo PSA. O CEO de Opel, Karl-Thomas Neumann, e o director de Opel España, Antonio Cobo, protagonizaron na mañá deste martes a saída do primeiro vehículo deste modelo da cadea de produción.

Trátase dun crossover compacto que ten o aspecto exterior dun SUV con carrozaría de dúas cores, interior amplo para cinco persoas e unha conectividade moi desenvolvida. Véndese a un prezo básico de 18.042 euros en España IVE incluído. A planta zaragozana fábrica 250 unidades ao día.

Neumann indicou que o Crossland X forma parte da "gran ofensiva" de produto de Opel e PSA, que inclúe o lanzamento de máis de 20 novos modelos ata 2020, un proceso no que a factoría de Figueruelas producirá o novo modelo de Corsa desde 2019.

As expectativas son "extremadamente altas", dixo Neumann, expresando que o mercado español é "unha verdadeira columna vertebral" en Opel. Engadiu que a saída do primeiro Crossland X simboliza a competitividade e o "compromiso" con España.

"É un día moi especial" para esta planta, comentou Cobo, quen deixou claro que "comeza unha nova era para Opel".