Copasa e Acciona acaparan as grandes obras públicas galegas

A guerra que comezaron hai unhas semanas Acciona e Copasa a conta da adxudicación dos accesos ferroviarios ao Porto Exterior de Ferrol non se entendería sen examinar o que suman as dúas empresas en obra pública en Galicia. O pasado ano Acciona levou 91 millóns de euros, fronte aos 77,67 de Copasa. As dúas moi lonxe da terceira Ogmios, que só contratou obras por pouco máis de 21 millóns.

E é que o montante total dese contrato acendeu a case 72,5 millóns de euros, unha suma que supón, practicamente, a facturación anual das dúas empresas só nunha única obra. Por iso, a principios de marzo Acciona denunciou que esta adxudicación podía dar lugar a un delito de “prevaricación, tráfico de influencias e malversación”. Unha denuncia moi rara entre grandes construtoras e que, finalmente, desestimou o Tribunal Administrativo Central de Recursos Contractuais, dependente do Goberno central.

O pastel da obra pública é do máis apetecible para as grandes construtoras. De feito o pasado ano supuxo para as construtoras de Galicia o ingreso de 409 millóns de euros dos 610 millóns adxudicados en concurso públicos, o 67% do total. Non obstante, das cinco grandes que recibiron, só dúas teñen sede en Galicia, Copasa e Ogmios, precisamente, as dúas foron da man, xunto con Geotunel, nunha UTE na adxudicación denunciada por Acciona.

Proxectos como o do AVE, a construción dos tramos das autovías pendentes, sobre todo a de Santiago-Lugo, ou os accesos ferroviarios ao porto exterior de Ferrol son as grandes obras públicas pendentes e máis suculentas en conto ao orzamento da adxudicación. De feito, supoñen máis dun 40% do total das adxudicacións do pasado ano, 235 millóns en concursos públicos que dependen do Estado.

O resto son de obras públicas da Xunta ou dos concellos e deputacións. Así, o Goberno galego destinou 178,6 millóns, e os organismos provincias e concellos, pouco máis de 177 millóns. Con todo son estas últimas institucións a que máis contratan con empresas de Galicia. En total, o pasado ano, 143,2 millóns adxudicados por concellos (93,5% do total) e 33,8 das deputacións (o 88,4%) quedaron no país. Unha cifra que se rebaixa ao 70% no caso da Xunta e a case un 44% no caso das adxudicacións do Goberno español.

Acciona, a predilecta da Xunta

Con todo, desde que Feijóo é presidente da Xunta a construtora que máis obra pública adxudicada leva é Acciona, con sede social en Madrid. En total son 227 millóns de euros, o 10,4% de total da obra pública executada en Galicia desde 2009 ata o 2016.

Segundo os datos da Federación Galega da Construción, a segunda empresa é Copasa, de Ourense, que suma 203 millóns de euros, en total o 9,3% das obras. Siguenlle empresas tamén galegas, C. Taboada y Ramos, de Lalín, con 97,2 millóns e CRC Obras y Servicios, da Coruña con 97 millóns.