O xefe de Infraestructuras en Pontevedra, na corda frouxa
Louzán deféndeo, pero Feijóo marca distancias con Evaristo Juncal. Fíxoo nunha rolda de prensa na que o presidente puxo en evidencia que o PP está a utilizar a Xunta para atacar ao PSOE.
Por Walter Burns | | 03/06/2010 | Actualizada ás 23:58
“A proba caligráfica vaina facer a Xunta ou o PP?”. O presidente da Xunta tragou saliva cando unha xornalista lle lanzou esta cuestión ao final da rolda de prensa do Consello de cada xoves.
“Non o sei”, tivo que contestar, evidencia que o PPdeG está a utilizar os datos da Xunta para tentar crear un escándalo mediático en torno á presunta financiamento ilegal do PSOE con subvencións do bipartito. Para os socialistas é unha “cortina de fume” que van desmontar nos xulgados, pois hoxe Pablo García, o seu número 2, presentou unha querela contra Rodríguez Miranda, número 3 do PP, por identificalo como líder da presunta trama de “financiamento ilegal”.
Foi unha comparecencia dura para o presidente. Acostumado a presumir de austeridade e atacar o Goberno central, Feijóo desta volta tivo que pasar media hora aclarando dous casos de presunta corrupción no seu partido, o de Gondomar e o de Evaristo Juncal.
O caso de Juncal, desvelado por El País, é o que máis se pode complicar a curto prazo. De feito, Feijóo marcou este xoves distancias e en ningún momento defendeu a inocencia do xefe da Consellería de Medio Ambiente, Transportes e Infraestruturas na provincia de Pontevedra.
E é que na sede central do PPdeG témese moito este asunto, pois Juncal xa recoñeceu que vendeu até tres empresas a presuntos testaferros de narcotraficantes.
Por iso Feijóo limitouse hoxe a dicir que agardará o informe que Juncal ten que presentar ao seu superior, o conselleiro Agustín Fernández. Tamén resaltou que Juncal, cabeza do PP en Caldas, non é un “alto cargo”, senón un funcionario máis. Iso malia que o xefe territorial é un cargo de libre de designación e aparece a miúdo en actos políticos, canda o superdelegado Cores Tourís.
O informe de Juncal probará na actualidade só é dono dunhas adegas, polo que en teoría non cae en ningunha incompatibilidade. Outra cousa é a actividade da súa familia máis próxima, moi relacionada co mundo da construción e con moi bos amigos entre os alcaldes conservadores da comarca do Barbanza.
