Máis de 2,4 millóns de telespectadores seguiron o Masterchef que se trasladou a Santiago de Compostela

O programa Masterchef, que na súa edición deste domingo dedicou o bloque central a Santiago de Compostela, alcanzou unha audiencia de 2,4 millóns de telespectadores, o que supón unha cota de pantalla do 17,2 por cento.

Segundo as cifras de audiencia recollidas por PR Noticias, os pratos galegos cociñados polos aspirantes de Masterchef desde Santiago de Compostela foron o espazo máis visto da xornada do domingo.

O minuto de ouro deste espazo produciuse ás 23,53 horas, cando se alcanzou un 'share' do 26,8% e 2.944.000 telespectadores. Neses momentos na pantalla dábase inicio á deliberación dos comensais que probaron as receitas dos concursantes no Hostal dos Reis Católicos.

MENÚ GALEGO

Os concursantes de Masterchef viaxaron a Santiago na proba de exteriores para preparar un menú galego, con axuda do chef Pepe Solla (unha estrela Michelin) e Paloma (finalista de MasterChef Junior).

Aos pés da Catedral compostelá, os concursantes elaboraron polbo á feira, caldo galego, lacón con grelos e tarta de Santiago e dous deles tiveron que desprazarse desde a Praza do Obradoiro ata a Praza de Abastos para facerse cos últimos produtos que faltaban para rematar as súas receitas.

Os pratos elaborados polo sete concursantes que aínda permanecen en Masterchef foron degustados polos asistentes a unha comida ofrecida no Hostal dos Reis Católicos, que contou coa participación de peregrinos e personalidades como o xerente de Galicia Calidade, Alfonso Cabaleiro.