O grupo vigués Enor constrúe 381 ascensores e escaleiras mecánicas para sete cruceiros de estaleiros Meyer

O grupo Ascensores Enor, dedicado á fabricación, instalación e mantemento de aparellos elevadores, pechou un contrato co grupo naval Meyer para a subministración dun total de 381 ascensores e escaleiras mecánicas para sete cruceiros que o estaleiro constrúe en Alemaña e Finlandia.

O presidente da Xunta, Alberto Núñez Feijóo, así o comunicou este martes durante unha visita ás instalacións de Enor no Parque tecnolóxico e loxístico de Vigo, onde destacou a expansión que está a experimentar este grupo empresarial que na cidade olívica conta cun persoal de 350 persoas.

No relativo ao contrato co grupo Meyer, comunicou que ascende a 40 millóns de euros e que consiste na construción dun total de 333 ascensores e 48 escaleiras mecánicas para sete cruceiros, que "probablemente se convertan en 10". "É un contrato importantísimo de ascensores especiais, con enormes mecanismos de seguridade", explicou.

Feijóo puxo en valor que se está producindo a recuperación da plena actividade nos estaleiros de Galicia, onde "practicamente todos" teñen carga de traballo. "Non é casualidade. Unha das razóns é a industria envolvente, que prové e facilita que as propostas dos estaleiros sexan factibles en mercados tan competitivos", valorou.

Así mesmo, lembrou que Enor --que instalou uns 800 ascensores en buques, e uns 18.000 en Galicia e o noroeste de España-- forma parte da multinacional Otis, tras unha fusión que supuxo "incrementar persoal, facturación e especialización". "Espero que nos próximos anos siga aumentando o persoal", selou.