A Comisión de Recuperación da Memoria Histórica da Coruña pide a ilegalización da Fundación Franco
Queren "frear" o que consideran unha "continua e impune apoloxía do franquismo".
- O PSdeG pide á Xunta que reprobe a Fundación Franco
- A Deputación da Coruña denunciará a Fundación Franco se hai “apoloxía franquista” no Pazo de Meirás
- A CRMH pide ao Parlamento galego que “lle pare os pés” á Fundación Francisco Franco
Por E.P. | SANTIAGO DE COMPOSTELA | 02/08/2017 | Actualizada ás 12:58
A Comisión de Recuperación da Memoria Histórica da Coruña (CRMH) pediu ao Goberno central a "ilegalización" da Fundación Francisco Franco para "frear" o que considera unha "continua e impune apoloxía do franquismo".
A CRMH solicita "normalidade democrática na liña do que fixo a Deputación da Coruña" anunciando, este martes, que "valoraría a posibilidade de denunciar á Fundación pola apoloxía do franquismo", e instando á Xunta de Galicia a que realice "unha comunicación nesa mesma liña".
"Nós suxerimos, a quen corresponda, á Fiscalía ou aos xuíces, que corrixan esta anormalidade e revisen as actividades desta fundación e que atendan ás súas manifestacións, que nos parecen moi próximas ao tipificado como delito de odio", engade a CRMH.
A Comisión reclama ao Goberno central que "interveña", ilegalizando a Fundación, en base á Lei de Fundacións ou aos delitos de odio tipificados no Código Penal. Mesmo remarca que, aínda que "non haxa leis que permitan actuar contra quen fai apoloxía do terror, utiliza o negacionismo para fomentar valores e prácticas antidemocráticas e despreza a memoria das vítimas do franquismo", asúmase "como urxente esta tarefa de dotar a un Estado democrático dunhas normas que protexan o seu carácter".
