Coristanco, o concello das tramas políticas

Son preguntas que non poucos se fan estes días logo do esperpento político vivido neste pequeno concello coruñés, no que, desde o pasado venres, nin PSdeG, nin PPdeG teñen representación política, pero cuxos edís foron os principais impulsores do seu cambio político. E este esperpento político acaba xa de chegar ao Parlamento galego e será o primeiro gran cabalo de batalla entre a oposición e o PPdeG no inicio do curso político.

Abraham Gerpe, ata hai uns días voceiro socialista e único edil nesta localidade, é agora o novo alcalde. Rexedor grazas ao apoio dos seis edís do PP que, agora, tampouco son do PP, xa que se pasaron ao Grupo Mixto. E todo para evitar que, oficialmente, a dirección deste partido se vexa envolta nun novo caso de transfuguismo político.

Así o denuncian TEGA, En Marea e o propio PSdeG. De feito, Terra Galega xa anunciou que impugnará pola vía contencioso-administrativa o pleno da moción do pasado venres ao entender que se incumpriu a legalidade ao dar por válido o voto dun concelleiro do grupo non adscrito. Así o anunciou o xa ex alcalde, Amancio Lavandeira, que cargou contra populares e socialistas.

Tamén o viceportavoz parlamentario de En Marea, Antón Sánchez, censurou a "actitude hipócrita e antidemocrática" do PP ao promover "de forma espuria" unha moción de censura e recolocar a un exalcalde sobre o que pesan sospeitas de "prácticas caciquiis e clientelares". "Se, como declara o PSOE, notificouse a súa expulsión en tempo e forma, o acordo [da moción de censura] é manifestamente ilegal", dixo ao tempo que pediu ao Estado que "actúe de oficio" para "restablecer a legalidade" neste municipio coruñés.

Xogando coa interpretación das leis

Precisamente, na validez ou non dese informe é o que está en entredito. Gerpe asegura que a súa expulsión “non é válida” porque non viña asinada pola Executiva Federal do PSOE. Desde o PSdeG lembran que está asinada pola presidenta da Xestora en Galicia, Pilar Cancela, e polo secretario provincial, Julio Sacristán. “E con iso xa chega”, indican.

“A expulsión foi comunicada en tempo e forma”, apuntan fontes consultadas do PSdeG por GC que suliñan que,a gora, a formación está estudando cos seus servizos xurídicos se o procedemento seguido durante a moción de censura foi correcto.  E o certo é que validez do procedemento foi delegada na Mesa de Edade do pleno por parte da secretaria, que decidiu inhibirse no proceso. “As alegacións por parte de Gerpe foron 15 minutos antes do pleno e en 15 minuto a secretaria do consello preparou ese informe para delegar na Mesa de Edade”, din estas fontes sobre a extrañeza da decisión.

Por iso, desde o PSdeG tamén apuntan cara ao PPdeG como instigador deste proceso. “O PPdeG en ningún momento expulsou aos seus edís. Reuníu á  súa executiva provincial pero non expulsou os seus concelleiros para que non apoiaran a moción. Iso unha hipocresía política. Ten parte grande de responsabilidade porque se procedera como o PSdeG, pois non habería moción”, apuntan estas fontes.

As decisións do PPdeG

Pola súa banda, o portavoz parlamentario do PPdeG, Pedro Puy, responsabilizou aos socialistas polas súas “divisións internas” ante o proceso de Primarias. Así, lembrou que a dirección provincial do PSOE na Coruña enviou "mensaxes contraditorias", pois primeiro "apoiou" a censura baseándose na situación local e despois retirou o aval a esa manobra.

En canto ao seu partido, xulgou que actuou "correctamente" e dentro do pacto antitransfuguismo, pois manifestou que "non apoiaba" a moción de censura ao ver que o único edil socialista en Coristanco fora expulsado do seu grupo. "Agora pouco máis pode facer", recalcou, tras mencionar a decisión da executiva provincial de abrir expediente disciplinario ao seis concelleiros que votaron a favor de que o bastón de mando de Coristanco pasase das mans de Amancio Lavandeira (Terra Galega) a Abraham Gerpe. 

Con todo, o seu partido decidiu deixar en suspenso esa medida porque, o venres, con posterioridade ao pleno e mediante un fax, os únicos edís que eran militantes do PP, Antonio Pensado e Juan García Velo, comunicasen a súa decisión de abandonar esta formación.Unha decisión que volveu levantar aínda máis sospeitas entre os partidos da oposición. “Isto mesmo xo ten feito noutras mocións de censura. Primeiro deixan que a fagan e logo que marchen ao Grupo Mixto”, criticaron desde en Marea. Precisamente, este grupo xa anunciou que levará a situación política ao primeiro pleno do novo curso político. Tamén os socialistas barallan facer o mesmo.