Descubrindo a fauna da Costa da Morte con ollos de Félix Rodríguez de la Fuente

De re naturae. Ese é o nome da canle que Chisco Lema, o ex alcalde de Corcubión e gran coñecedor da fauna e botánica da Costa da Morte, abriu en Youtube. O seu obxectivo é, precisamente, dar a coñecer a riqueza biolóxica que atesoura este recuncho de Galicia. E faino co estilo dun dos grandes pioneiros nos documentais sobre fauna en España, Félix Rodríguez de la Fuente.

Nos últimos vídeos, ademais de falar do seu animal preferido, o lobo, tamén amosa a fauna típica do mes de agosto na Costa da Morte, entre as que salienta, ademais do lobo, o raposo, a aguia cobreira ou a cigoña negra.