Por Galicia Confidencial | Silleda | 09/09/2017 | Actualizada ás 21:19
A Federación de Traballadores de Seguridade Privada da Unión Sindical Obreira (FTSP-USO) relata que os seus membros estaban esta mañá repartindo panfletos informativos nas que denunciaban a situación dos vixiantes do recinto á entrada do evento “Galicia Net R Encounter”,cando responsables da Fundación tentaron expulsalos ata a chegada dunha dotación da Garda Civil. Segundo a súa versión, a forza de orde permitiu que continuasen coa reivindicación.
Ante isto, critican a actitude da dirección, que “lonxe de tentar buscar unha solución ao conflito coartan a liberdade sindical dos traballadores afectados e dos seus representantes sindicais”. Nin a Xunta nin a súa Fundación responderon polo de agora as acusacións sindicais.
Desde o sindicato, lembran que esta problemática comeza coa adxudicación do servizo de seguridade destas instalacións á empresa Alcor Seguridade, que din está imputada por presunta fraude á Seguridade Social, á Facenda Pública, trafico de influencias, falsidade documental e delitos contra os traballadores, entre outros.
“Ademais, unha vez adxudicado o contrato, a compañía de seguridade incumpre o dereito de subrogación de case unha vintena de vixiantes vinculados ao servizo, quedándose estes en desemprego, e obrigados a xudicializar esta situación ante o desamparo, indiferenza e pasotismo sufridos por parte da Fundación”, conclúen.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.