O PPdeG ve unha "ocorrencia" a proposta de que Feijóo, Dorado e Oubiña comparezan no Senado
O PP pedira antes a comparecencia de varias cargos do Goberno de Venezuela. As peticións dos conservadores poden chegar a bo porto, dado que teñen a maioría na Cámara Alta.
Por E.P. | SANTIAGO DE COMPOSTELA | 22/09/2017 | Actualizada ás 15:36
O secretario xeral do PPdeG, Miguel Tellado, cualificou este venres de "ocorrencia" a petición de Unidos Podemos para que comparezan no Senado políticos como Alberto Núñez Feijóo, así como os narcotraficantes Laureano Oubiña e Marcial Dorado, para explicar os "vínculos" do narcotráfico e o suposto financiamento ilegal do PP.
En resposta a preguntas dos medios, Miguel Tellado lembrou que o seu partido deu xa "explicacións" sobre o suposto financiamento ilegal "nos xulgados" e no Congreso dos Deputados.
"E non temos máis que engadir", sentenciou. "Creo que é unha ocorrencia, e nós, sobre ocorrencias, non temos nada que dicir", engadiu.
Unidos Podemos pedíu estas comparecencias logo de que o PP pedira as do xornalista Eduardo Inda e varias cargos do Goberno de Venezuela. As peticións dos conservadores poden chegar a bo porto, dado que teñen a maioría na Cámara Alta.
De feito, a creación desta Comisión interpretouse como a resposta do PP á Comisión de Investigación sobre as súas finanzas no Senado. A petición de comparecencia dos narcotraficantes foi rexistrada por un senador de En Comú Podem, Óscar Guardingo.
