Debe a Xunta loitar para que a Axencia Europea do Medicamento veña a Galicia e non a Cataluña?
Feijóo xustifica que esta institución europea poida ir a Barcelona porque “segue sendo España”, aínda que di que a Xunta non retirou a candidatura galega para acoller este organismo, que deixará Londres cando se complete o 'Brexit'.
Por Galicia Confidencial | Compostela | 11/10/2017 | Actualizada ás 22:00
A Asociación de Médicos Interinos de Galicia (Asmig) pedía hai uns días ao presidente da Xunta, Alberto Núñez Feijóo, que reclamase a sede da Axencia Europea do Medicamento para Galicia, xa que "os recentes acontecementos que se están sucedendo en Cataluña poderían facer fracasar a candidatura de Barcelona para albergar a EMA (polas súas siglas en inglés)".
O presidente galego non descarta esta posibilidade, aínda que recoñece que Barcelona ten máis papeletas porque “segue sendo España” e porque alí se concentran as principais industrias farmacéuticas do Estado. "De feito, algunhas fontes falan xa sen andrómenas de que a Cidade Condal sería xa descartada pola UE para albergar a Axencia Europea do Medicamento pola situación de grave inestabilidade política", apuntaba hai uns días a Asmig. “É o momento de que outras cidades españolas tomen a substitución de Barcelona e volvan entrar no bombo", indicaba.
A Axencia Europea do Medicamento ten programado facer a mudanza antes de que se culmine o proceso do Brexit, isto é, marzo de 2019. Por iso, a institución abriu en abril deste ano a candidatura para cidades europeas dispostas a ser a nova sede. Será en novembro cando se coñeza a decisión final para albergar a nova sede, á que optan un total de 19 cidades europeas. Galicia presentou a súa candidatura, pero finalmente o Goberno central, e malia estar en marcha o proceso de independencia catalán, apostou por Barcelona como a opción do Estado español para acoller esta importante axencia; candidatura que ademais apoia a Agencia Española de Medicamentos y Productos Sanitarios.
Asmig advertía de que España podería así quedar sen ningunha sede de axencias europeas tras o Brexit, ao obrigar o Goberno central a retirar outras candidaturas presentadas no seu día, como a de Galicia ou a de Andalucía (Málaga), en prol de Barcelona. “Aínda que os prazos están moi axustados, Galicia aínda podería optar á sede da EMA, no caso de que o Goberno español decidise renunciar á candidatura catalá", indicaba a entidade. "A pertinaz insistencia da ministra de Sanidade (de orixe catalá) para levar a Cataluña a EMA deuse de bruzos coa crúa realidade dun proceso cuxos riscos eran máis que evidentes hai xa moitos meses", engadía Asmig.
A XUNTA DI QUE MANTÉN A CANDIDATURA
Por iso, considera que "agora chega o momento das lamentacións, a non ser que se actúe con rapidez e se proceda a promover a candidatura de Santiago, A Coruña ou Vigo como reposto de Barcelona", indicaba a Asmig.
En resposta a esta inquietude dos médicos interinos e preguntado por GC, Feijóo daba a enteder na rolda de prensa posterior ao Consello da Xunta deste xoves que Barcelona segue sendo a aposta do Goberno de Rajoy. “Que saibamos, Barcelona e Cataluña seguen sendo España”, respondeu.
En todo caso, e contrariamente ao que di o Goberno español, apuntou que a Xunta “non retirou” a súa candidatura aínda. “Cremos que Galicia ten as condicións axeitadas”, dicía ao tempo que recoñecía que se propoña Barcelona porque nesta cidade e en Madrid se concentran as principais industrias farmacéuticas do estado. “Pero en Galicia temos unhas instalacións importantísimas de investigación como son as do Campus Vida”, engadía.
Pero o certo é que o Goberno central mantén a súa aposta por Barcelona e desbotou a candidatura galega hai xa meses. Tanto é así, que o pasado venres España presentou ás delegacións diplomáticas dos Estados comunitarios en Bruxelas ante a Unión Europea a candidatura catalá cunha presentación a cargo do embaixador español ante a UE, Pablo García-Berdoy.
Tamén dende hai tempo, e como puido saber GC, a Agencia Española de Medicamentos y Productos Sanitarios, con sede en Madrid, apoia de xeito incondicional a candidatura de Barcelona, pola que está facendo promoción interna e externa, e manexa enquisas entre os traballadores da Axencia Europa do Medicamento que situarían a candidatura barcelonesa entre as favoritas dos funcionarios europeos.
Así as cousas, sorprende que coa formulación oficial de Barcelona como a elixida por España, o presidente da Xunta manteña que Galicia segue sendo candidata a acoller esta axencia europea. Con todo, unha futurible declaración de independencia de Cataluña podería mudar as cousas, pero non garante a opción galega. Preguntado por este xornal, o Ministerio de Sanidade decidiu non contestar ao respecto.
