Aprobada a lei que elimina as garantías medioambientais nos grandes proxectos industrias

Superada, en solitario, cos votos do PPdeG, a Lei de fomento empresarial entre reproches pola xestión dos incendios. A oposición lembra a "falta de escrúpulos" do PP na vaga de lumes de 2006 e Tellado critica aos "pirómanos" que exhiben "camisetas" para facer "política" co lume

Por E.P. | SANTIAGO DE COMPOSTELA | 17/10/2017 | Actualizada ás 18:13

Comparte esta noticia

O apoio do PP bastou este martes no Parlamento de Galicia para sacar adiante a Lei de fomento da implantación de iniciativas empresariais, que chocou contra o rexeitamento de PSdeG e BNG. Pola súa banda, En Marea optou por non votar, a fin de mostrar o seu desacordo con que o pleno non abordase de xeito monográfico os incendios que aínda persisten nesta comunidade.

Contra a mina de ouro en Corcoesto
Contra a mina de ouro en Corcoesto | Fonte: Bocixa Tingalaranga

No debate desta normativa, coñecida entre numerosos colectivos ecoloxistas como a "Lei de depredación de Galicia" e que foi impulsada polo PP, os grupos reproduciron os argumentos utilizados desde o inicio da súa tramitación e abordaron tamén os lumes rexistrados este fin de semana, pero Antón Sánchez (En Marea) tratou de centrar a súa intervención únicamente nesa cuestión e foi reprendido polo presidente da Cámara, Miguel Santalices.

Logo das tres preceptivas chamadas á cuestión durante a súa primeira quenda de palabra, o deputado do grupo rupturista denunciou o uso da "forza" contra el para impedirlle intervir, o que lle valeu tamén un aviso. O segundo chegou --e o terceiro supón a súa expulsión da sesión plenaria-- no peche do debate, tras o que abandonou o hemiciclo.

En paralelo, Noa Presas (BNG) tivo palabras de "solidariedade" cos afectados tras censurar o "abandono" ao que estiveron sometidos por parte das administracións; mentres Abel Losada (PSdeG) denunciou a ocultación de incendios en pequenas aldeas onde as lapas chegaron "literalmente ata as casas" e recordou que ningún cargo socialista "púxose mocasíns" nesta ocasión.

Do mesmo xeito, Antón Sánchez recriminou aos populares a "falta de escrúpulos" que tiveron na ola de incendios de 2006, coa "foto de Feijóo coa mangueriña" incluída, para acusarlles de perseguir "réditos políticos", ao que o seu viceportavoz parlamentario, Miguel Tellado, cargou contra os "pirómanos", tanto os que queiman os montes como os que exhiben "camisetas" para facer "política" cos lumes.

Pleno na Cámara galega
Pleno na Cámara galega

COMPARECENCIA DE FEIJÓO?

Estas intervencións fóronse sucedendo nas distintas quendas de palabra, despois de que, xusto antes de iniciarse a sesión plenaria, os tres portavoces da oposición reclamasen a comparecencia do presidente da Xunta.

Esa cuestión non foi admitida polo PP, que, en cambio, introduciu a presenza da conselleira de Medio Rural, Ángeles Vázquez, para informar da situación dos incendios en sustitución da titular de Medio Ambiente, Beatriz Mato.

LEI DE FOMENTO EMPRESARIAL

Máis aló das alusións aos lumes, a deputada nacionalista denunciou que a lei que se aprobou incide na "desregulación", o "desequilibrio territorial", a "persecución" aos montes comunais e a "desprotección" ambiental, entre outras cuestións, e lamentou a escasa vontade de diálogo do PP.

Nesas apreciacións coincidiu o representante socialista no debate, quen, tras subliñar que se trata dunha norma "ideolóxica", puxo o foco na supresión de controis que conleva e en que nin sequera conta con memoria económica.

E, en liña coa súa intención de falar únicamente de incendios, Antón Sánchez advertiu de que este texto lexislativo "profunda moito máis" no "abandono" do medio rural, o que "incrementa" o risco de lumes.

Fronte a iso, o portavoz popular na materia acusou á oposición de pretender que a administración sexa "unha fábrica de trabas á iniciativa económica", partidario de "simplificar, liberalizar e potenciar" a instalación de proxectos velando, iso si, por que teñan "garantías".

"DOUS MODELOS"

"Hai dous modelos", resumiu, non sen reivindicar que se alcanzaron "acordos" coa Federación Galega de Municipios e Provincias (Fegamp), que preside un socialista, e soster que a oposición está "en contra" da creación de postos de traballo e a favor de "pechar" empresas.

Coa existencia de "dous modelos" coincidiu Noa Presas, quen comparou o "máis salvaxe neoliberalismo do PP" coa súa opción, de impulsar actividades de "alto valor engadido" e que favorezan o peche dos ciclos produtivos. "A súa única idea é que os concellos baixen impostos", sinalou, e botou en falta medidas que favorezan o acceso ao crédito para as empresas e que promovan o retorno das deslocalizadas.

"SOTO DEL REAL CORPORATION"

A continuación, Abel Losada negou que o PSOE persiga o peche de ningunha compañía, pero deixou claro que si defende "a burocracia". "A alternativa é 'Soto del Real Corporation'. ¡A alternativa son os lerchos, aos que eu condeno!", sentenciou o vigués.

Para pechar o debate, Tellado atribuíu as críticas da oposición a que lle "molesta que Galicia vaia ben", coa economía crecendo e o paro baixando.

E respondeu a esas "insinuacións" lanzadas polo economista do PSdeG co recordo de que os seus dous últimos secretarios xerais, en alusión a Pachi Vázquez e José Ramón Gómez Besteiro, "están imputados". En canto ao actual, a quen se referiu como "o outro Caballero", afeoulle que está "instalado" no 'non é non'.

Mina en Touro
Mina en Touro
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta