Encontros, seminarios e un concerto conmemorarán os 30 anos do Camiño como Itinerario Cultural Europeo

Encontros, congresos, seminarios e un concerto na Catedral compostelá protagonizado por Amancio Prada conmemorarán o 30 aniversario da declaración do Camiño de Santiago como Primeiro Itinerario Cultural Europeo.

A directora de Turismo de Galicia, Nava Castro, e o secretario xeral de Cultura, Anxo Lorenzo, presentaron este xoves o programa conmemorativo desta efeméride, que comezará o vindeiro luns, día no que se cumpren tres décadas do recoñecemento do Consello de Europa ao Camiño.

Nava Castro aproveitou esta ocasión para dicir aos galegos que "deben sentirse orgullosos do traballo común feito ao redor dos Camiños de Santiago ao longo deste tempo", un elemento "sen o que non se entendería o progreso" de Galicia.

Pola súa banda, Anxo Lorenzo destacou a relevancia universal do fenómeno xacobeo, "símbolo da hospitalidade e da fraternidade" que está na "orixe da construción de Europa". Sobre o Camiño, dixo que se trata de "un espazo cultural e patrimonial vivo, que os poderes públicos deben coidar e preservar, promover e dinamizar".

A conmemoración deste 30 aniversario servirá para recapitular o realizado e para sentar as bases dos retos e oportunidades desta declaración a través da colaboración con numerosas institucións internacionais, europeas, nacionais e galegas.

ACTO OFICIAL

O Hotel Monumento San Francisco acollerá o luns o acto oficial de conmemoración, ao que seguirá esa mesma tarde un concerto do artista Amancio Prada na Catedral de Santiago, xunta á Escolanía e aos Nenos Cantores da Orquestra Sinfónica de Galicia.

Desde o luns, e ata o mércores 25, terá lugar tamén o seminario 'Camiño de Santiago e Europa', organizado pola Cátedra do Camiño de Santiago da Universidade de Santiago (USC) en colaboración co Grupo Compostela de Universidades.

Este encontro, con relatorios, mesas de debate e laboratorios prácticos, contará coa participación de catedráticos, profesores e especialistas de varios países que profundarán na realidade da ruta xacobea desde perspectivas como a antropoloxía, o patrimonio, a sustentabilidade, as políticas públicas, a arte ou a historia, entre outras.

Tamén durante eses días reunirase na capital galega o Comité Técnico da Federación Europea do Camiño de Santiago e, na xornada do luns, fará o propio o Comité Executivo do Consello Xacobeo.

PREMIOS CAMIÑO DE SANTIAGO

O martes, día 24, entregaranse os Premios Camiño de Santiago 2017, cos que se recoñece o traballo neste ámbito de institucións públicas, asociacións, empresas, colexios, universidades ou investigadores.

O programa conmemorativo proseguirá en novembro con tres citas máis. A primeira será o día 6, cun encontro dos Itinerarios Culturais Europeos no Centro Superior de Hostalaría de Galicia. Posteriormente, do 9 ao 11, Santiago acollerá o X Congreso Internacional de Estudos Xacobeos.

Finalmente, as conmemoracións concluirán co International Seminar on Transnational Tourism Themes and Routes, organizado por Turismo de Galicia xunto á European Travel Comission e a World Tourism Organisation. Nesta cita estarán presentes os responsables de ambos os organismos, así como representantes da Unesco, o Parlamento Europeo ou a Asociación Europea de Turismo, entre outros.

CRECE A CIFRA DE PEREGRINOS

Durante a presentación dos actos, Nava Castro avanzou que esta semana o Camiño de Santiago superou a cifra de peregrinos do ano pasado, co que alcanza a súa marca absoluta.

En concreto, das máis de 280.000 compostelas entregadas na Oficina do Peregrino no que vai de ano, o 55% recolléronas camiñantes chegados desde fóra de Galicia, de 177 nacionalidades.

Isto supón, dixo Castro, unha "enorme riqueza cultural" e "unha oportunidade de desenvolvemento económico e social" que é necesario "saber aproveitar".