Por E.P. | A CORUÑA | 02/12/2017 | Actualizada ás 14:47
O portavoz nacional de Anova, Antón Sánchez, asegurou que os comicios cataláns do 21 de decembro van "moito máis alá do electoral" polo que descartou situarse a favor dunha forza política concreta. "O máis decisivo é a derrota do bloque do 155", manifestou.
Antón Sánchez pronunciouse deste xeito, após aprobar a coordinadora nacional de Anova un calendario de encontros locais e comarcais para preparar as municipais de 2019.
Na súa intervención, Sánchez asegurou que a súa organización "foi moi clara" no conflito catalán. "Sempre dixemos que deixou de ser un tema catalán, que está en xogo a calidade democrática (do conxunto do Estado)", subliñou para mostrarse "claramente a favor do dereito a decidir, en contra da aplicación do artigo 155 e da represión do Estado".
Neste sentido, recoñeceu que Anova aínda non decidiu se participará de forma activa nestas eleccións cuxo mapa, na súa opinión, "non é trasladable a Galicia". "Na defensa desas ideas coincidimos cun amplo espectro social que hai en Cataluña", destacou.
"Onde podamos contribuír nese sentido, de defensa dunha democracia real, do dereito a decidir e en contra da represión, pois aí vai estar Anova", sinalou.
PARTICIPACIÓN DE ANOVA
De feito, Anova, como forza política nacionalista, participou en actos da órbita independentista (como a CUP), pero en Galicia apoia a unidade popular que ten o seu reflexo electoral en En Marea, cuxa forza política análoga sería a confluencia catalá na que participa En Comú.
Precisamente, En Marea celebra este domingo unha reunión do seu Consello no que se abordará se se adopta un posicionamento respecto diso das eleccións catalás do próximo 21 de decembro, aínda que non está decidido que haxa un pronunciamiento expreso de apoio a unha formación política.
Con todo, nas últimas horas referentes das mareas como o alcalde da Coruña, Xulio Ferreiro, xa mostrou o seu apoio expreso á alianza de En Comú e Podemos. "Quedan poucos días para o inicio da campaña electoral en Cataluña. Moitos ánimos a @XavierDomenechs e @AdaColau . Fronte ao 155, hai alternativa. Por un futuro en Común", chiou en Twitter.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.