Galicia ve "insuficiente" a última proposta sobre cotas e espera "boas noticias"

A conselleira do Mar, Rosa Quintana, cualificou como "insuficiente" a proposta que os ministros dos Vinte e oito rexeitaron pola mañá deste martes sobre as posibilidades de pesca da frota comunitaria en 2018, á vez que augurou unha negociación "moi dura", aínda que confía en que haxa "boas noticias" ao termo do encontro.

"Parécenos totalmente insuficiente a proposta que hai mesmo para o boquerón, pero xa nos parece non aceptable o que nos propoñen no caso da pescada sur, os galos e o rape", expresou aos medios de comunicación en Bruxelas.

Quintana cualificou como "moi dura" a negociación entre os responsables de Pesca dos países do bloque comunitario e sinalou que o documento elaborado pola presidencia de Estonia, que ostenta ata que termine o ano a presidencia de quenda da UE, e que rexeitaron os ministros, melloraba "un pouco" a situación da anchoa ou boquerón do Golfo de Cádiz pero non a do resto de especies de interese para a frota española.

"De momento estamos na negociación. Non nos parece nada aceptable o documento que nos presentaron pola mañá", insistiu, para despois confiar en que haxa "boas noticias" ao longo do día.

"Seguimos negociando, non entendemos que algúns outros países saian mellor que nós nas propostas da Comisión, Seguimos defendendo con moitos argumentos, con argumentos moi sólidos, o que é a nosa liña argumental desde o principio da reforma: igualdade de peso para criterios ambientais, sociais e económicos", subliñou.

Neste sentido, Quintana defendeu a necesidade de perseguir unha "boa situación biolóxica" dos recursos e "a posición social e económica" do sector pesqueiro. "Pedimos á Comisión Europea que teña sensibilidade, que non vaia máis aló dos propios datos científicos e que nos permitan todas esas posibilidades de pesca", salientou.

O PLAN DA SARDIÑA "VAI POLO BO CAMIÑO"

Doutra banda, a conselleira do Mar asegurou que o plan de xestión para a pesqueira da sardiña, que presentaron España e Portugal a semana pasada, "vai polo bo camiño", despois da reunión que a ministra de Agricultura e Pesca, Isabel García Tejerina, e a súa homóloga portuguesa, Ana Paula Vitorino, mantiveron este luns co comisario de Asuntos Marítimos, Karmenu Vella.

En calquera caso, Quintana evitou ser tan optimista como a ministra portuguesa, que practicamente descartou o peche da pesqueira. "O único que podemos dicir é que presentamos un plan, que a Comisión quedou en estudar ese plan, que en principio lle gusta o plan. Pero que nos comunicarán as súas consideracións unha vez que o estuden e o analicen", dixo.

"Por tanto, eu creo que non podemos dar por seguro que este plan estea aprobado porque se cadra nos fan algunha recomendación nalgún aspecto a mellorar. Por iso creo que vai por bo camiño o tema da sardiña pero non me atrevo a dicir moito máis que isto", engadiu.

Neste contexto, a conselleira defendeu a mesma argumentación que nas negociacións para as cotas de pesca e afirmou que "hai que saber compaxinar a recuperación dos caladoiros co impacto social e económico" das decisións que se toman sobre o sector.