A adaptación de 'Divinas Palabras' de Xesús Ron e membros de 'Chévere' marca o programa do Centro Dramático Galego

Valle-Inclán regresa unha vez máis á programación do Centro Dramático Galego (CDG) cunha nova adaptación en lingua galega, neste caso da peza 'Divinas Palabras' que correrá a cargo do director Xesús Ron, recoñecido integrante da compañía 'Chévere', e protagonizada por outros dous artistas desta agrupación: Patricia de Lorenzo e Manuel Cortés.

Esta obra representa unha das máis destacadas creacións do autor, que el mesmo cualificou de 'traxicomedia de aldea', e que xerou interese en directores da talla de Ingmar Bergman ou Francisco Nieva. Tal e como lembraron tanto a directora do CDG, Fefa Noia, como o propio Ron, supón unha "débeda" ao tratarse da peza coa que se tentou inaugurar a vida desta entidade en 1984 e que non se puido levar a cabo por non dispor dos dereitos para a súa tradución en galego.

A programación da nova temporada representa para Noia o concepto de cuestionar a identidade e os constructos "que nos dan por feitos" e "negar verdades que se din desde hai moito tempo e que igual non o son tanto". De aí a lema 'Xa non hai que dicir que chove' co que se dá a coñecer este novo programa.

A estrea desta versión de 'Divinas Palabras' será 12 de abril e para Ron representa "un reto", aínda que abordarán a peza fóra desa "mirada sacralizada" da figura de Valle, apropiándose "con todas as consecuencias" da palabra escrita e sendo "tremendamente honestos". "Non lle temos medo", asegurou.

COPRODUCIÓNS

O programa de coproducións inclúe catro montaxes con compañías galegas, en concreto '#camiños' de ButacaZero, o espectáculo 'Arnoia, Arnoia' por parte de Pistacatro e dirixido por Quico Cadaval, a través do texto de Xosé Luís Méndez Ferrín; 'Anarquismos', de Pablo Fidalgo'; e a xa estreada 'Elisa e Marcela', de A Panadaría.

Un dos obxectivos do CDG pasa tamén por avanzar na a colaboración coa escena galega, a través de programas formativos e outros como 'Dramaturxente', polo que se creará un grupo de traballo dirixido por Manuel Lourenzo no que se seleccionarán dez autores para que realicen pezas teatrais, das que tres levarán a escena no marco desta nova programación.

Noia tamén valorou outras propostas como 'Teatrhoxe', 'Lanzadeira' ou o 'Taller de Dramaturxia', mentres que 'En Residencia' ofrecerá o Salón Teatro e a asistencia técnica do CDG a diferentes compañías para últimar as súas propostas, entre elas 'Garaxe' de Voadora ou 'Afterparty', de A Feroz.

Doutra banda, o ciclo 'Teatro Ob-Sceno' incluirá propostas de pequeno formato, como 'Amor' e 'Deixa de Tocala, Sam', ademais do 'Gran Teatro para os máis pequenos', con talleres de 'monicreques' previos a funcións teatrais.

INSTITUCIÓN "MOI DEBILITADA"

Sobre todo, esta nova planificación destaca pola implicación de 'Chévere', Premio Nacional de Teatro 2014, e do director Xesús Ron, compañía que non cruzou camiños co CDG desde 1989, e que se decidiu a implicarse tanto polo simbolismo de liquidar a débeda desta peza de Valle-Inclán como polo desexo de que esta entidade inicie unha "nova etapa".

Durante o acto de presentación do programa no Salón Teatro compostelán, Ron animou á "reflexión" sobre a situación do CDG, institución "moi debilitada" e que require do acordo de "todos" os actores implicados para que "represente a vitalidade, a riqueza, o pluralismo e a enorme calidade e proxección tanto interior como exterior do teatro galego actualmente", concepto que ve "reflectido" na nova programación.

"Gustaríanos que fose a última produción propia nesta contorna de certa precariedade e inaugure unha nova etapa, que teña capacidade de produción e ambición que nos equipare aos grandes teatros europeos", sinalou.

Así, reclamou "un compromiso firme" sobre o que se entende como teatro galego, "que non está representado adecuadamente" na entidade, pasando por un aumento orzamentario en próximos anos e por un marco xurídico adecuado que permita adecuar a xestión aos novos tempos, consolidándose como interlocutor "eficaz" con outras institucións similares no panorama internacional.

"UN AQUELARRE COLECTIVO"

Tras Ron tomou a palabra o conselleiro de Cultura, Educación e Ordenación Universitaria, Román Rodríguez, que confiou en que esta programación permita "pechar o círculo" de excelencia e de bo facer, máis aló dos "altos e baixos", dunha entidade (o CDG) que cumpre "unha función fundamental" de apoio público a un sector cunha actividade "transgresora" e de reivindicación que debe manterse.

Para iso, reclamou un "compromiso colectivo" de todas os "elos" da cadea, dado que "se falla un falla o produto final", e lembrando que o obxectivo é "achegar o teatro á xente". "Con esta produción e programación ímolo a facer", asegurou.

Neste sentido, a pesar dos "momentos complexos" vividos nos últimos anos, reivindicou un "aquelarre colectivo" entre todas as partes implicadas para "ser capaces" de facer producións "que se demanden e se queiran ver", dado que "o consumidor responde cando hai unha boa oferta". Fronte a iso, advertiu de que "unha guerra de guerrillas" traería "máis dificultades" para lograr este obxectivo.

Trala presentación da oferta, Rodríguez animou, en declaracións aos medios, a unha "reflexión colectiva máis aló dos orzamentos", incidindo no "enorme potencial" que conta o sector e animando a "mirar cara a adiante" e traballar "cun obxectivo común", que é lograr "unha conexión coa sociedade".