O BNG continúa a campaña contra as peaxes da AP-9 con berros de "estafa" durante o acto de Rajoy en Santiago

O BNG continúa a campaña contra a subida das peaxes na AP-9 e pola transferencia a Galicia cun acto de protesta este mércores durante a inauguración da ampliación da capacidade da autoestrada ao seu paso por Santiago, protagonizada polo presidente do Goberno, Mariano Rajoy.

Varios membros do Bloque concentráronse alén da autoestrada mentres Rajoy, o actual ministro de Fomento, Íñigo de la Serna; a súa antecesora no cargo, Ana Pastor e o presidente da Xunta, Alberto Núñez Feijóo, destapaban un cartel da AP-9.

Neses momentos, ouvíronse berros de "estafa", entre outros cánticos en rexeitamento ao incremento de peaxes que acomete este ano a concesionaria da vía, Audasa.

Este acto de protesta é "simbólico", segundo destacan os nacionalistas a través dun comunicado, no que lembran que é similar ao que levaron a cabo fai catro días na apertura da ampliación da ponte de Rande.

O Bloque, como anunciou a portavoz nacional, Ana Pontón, na presentación desta campaña en Pontevedra con alcaldes e cargos municipais, "nin tira a toalla, nin está disposto a cruzarse de brazos" ante o "vergoñoso" veto á transferencia, nin ante a nova subida das tarifas dunhas peaxes que constitúen, ao seu xuízo, "unha estafa legalizada".

Dentro desta campaña, o BNG presentou un recurso ante o Tribunal Constitucional polo veto do Congreso ao debate da lei de transferencia da AP9, e no próximo pleno presentará unha proposta para investigar os convenios asinados entre o Ministerio de Fomento e Audasa en 2011 e 2013.

Igualmente, pedirá investigar as condicións laborais "totalmente abusivas" en que levaron a cabo as últimas obras de ampliación, que, segundo denuncia, "mesmo causaron unha vítima mortal".

No acto de protesta deste mércores en Santiago, o portavoz municipal e membro da Executiva Rubén Cela advertiu de "a caída do investimento inicialmente anunciado para a realización das obras do orbital, tendo en conta que, dos 45 millóns de euros que se computaban, a cifra que se baralla agora é de 27 millóns de euros".