Médicos reclaman máis persoal e recursos para evitar colapsos pola gripe

A plataforma de sindicatos médicos CESM-O'Mega advertiu este luns de que, segundo os expertos, "o pico da gripe aínda non chegou", polo que reclama máis persoal sanitario e recursos para evitar colapsos nos diferentes niveis asistenciais.

O secretario xeral de O'Mega, o doutor Manuel Rodríguez Piñeiro, denunciou en nome da plataforma de sindicatos médicos "a deterioración da sanidade en Galicia" e incidiu en que "as situacións de colapso e sobrecarga asistencial inícianse no mes de xuño sendo constantes até finais de febreiro do ano seguinte".

Así, explicou que, por unha banda, na actualidade a Atención Primaria sofre "unha situación de abandono por parte da Administración, que ve incrementada ano a ano, provocando que non sexa capaz de satisfacer a demanda".

"A solución que se esta expondo na reforma da Lei de Saúde de Galicia vai agravar aínda mais esta situación ao acentuar a marxinación da Atención Primaria", asegurou.

"Todos os anos desde o verán até febreiro o colapso é continuado como consecuencia da poboación debido entre outras causas á afluencia de turistas en zonas costeiras. Ao coincidir coas vacacións dos profesionais que non son substituídos na súa inmensa maioría e a eliminación dos chamados reforzos de costa fai que o persoal quede en precario", sosteñen os sindicatos médicos, que precisan que iso "fai que se demore a atención ordinaria, creando listas de espera nos meses seguinte, repetíndose o ciclo e empeorando nas festas de Nadal".

Neste sentido, a plataforma de sindicatos médicos afirma que "as consultas dos centros de saúde están totalmente desbordadas" por que un profesional se ve "obrigado" a atender ao longo da súa xornada "un número de pacientes que supera os 60", polo que concretan que "se se cumprise o cociente de 10 minutos por paciente serían precisas un mínimo de 10 horas para atendelos".

Tamén subliñaron que "a sobresaturación das consultas de Atención Primaria xera que os pacientes acudan en busca de atención ao centro de atención continuada (PAC) e mesmo aos servizos de Urxencias hospitalarios".

"Os recursos da PAC e dos servizos de Urxencias están dimensionados para dar cobertura a unha determinada demanda, polo que cando se espera ou se detecta un incremento da demanda deben de habilitarse os recursos necesarios para dar resposta á mesma e así evitar o colapso. Algo que non se fai", recalcan.

SATURACIÓN EN URXENCIAS

Así mesmo, subliñan que a saturación nos servizos de Urxencias "é algo frecuente e que denunciamos todos os anos". Así expuxeron que no pasado mes de decembro e neste xaneiro "viuse incrementada de forma moi importante a demanda, debido a varias circunstancias (festivos e climatoloxía), algo que se repiten e por tanto a maioría das veces é previsible".

"É máis, este ano como todos solicitouse que se incrementasen os recursos para paliar os efectos da gripe, pois sabiamos que nas nosas antípodas os efectos foran moi importantes", lembraron, para avisar de que "segundo os expertos o pico da gripe aínda non chegou". "Espérase outro pico de gripe", advirten.

Tamén incidiron en que "a falta de camas operativas provoca que as urxencias susceptibles de ingreso teñan que permanecer moitas horas en urxencias ocasionando que os servizos de urxencias se colapsen e impidan que os profesionais poidan dar asistencia adecuada aos pacientes que acoden ao servizo".

Neste sentido, afirmaron que "se vulnera sistematicamente o dereito á intimidade e confidencialidade dos pacientes incumprindo os estándares mínimos de calidade asinados coa Consellería, as sociedades científicas e xefes de servizo", ao telos en corredores e non en camas en habitacións.

Por todo iso, advirten de que estas situacións orixinan nos profesionais "tensión emocional, problema de saúde laboral e impiden a atención de forma digna aos pacientes".

MEDIOS

Por todo iso, solicitan á Administración sanitaria galega que "se poñan os medios tanto humanos como materiais para evitar que continúe esta deterioración da sanidade pública galega".

Deste xeito, o presidente de CESM, José María Escudeiro, avogou por "descentralizar" a sanidade en Galicia para "achegar a solución ao problema" xa que, considerou, "o fallo está única e exclusivamente nos xestores".

Respecto diso, a doutora Marina Tallón do servizo de Urxencias do Complexo Hospitalario Universitario A Coruña (Chuac) afirmou que no seu centro "todos os días do ano teñen pacientes pendentes de ingreso sen cama".

Por iso, incidiron en que a "deterioración progresiva" da Atención Primaria, a falta de cobertura das baixas de facultativos por mor dunha "contratación insuficiente" e de dotación de recursos, así como a ausencia dunha "política de xestión adecuada en urxencias" e a "mala xestión das camas" fai "imposible atender de maneira adecuada aos pacientes", abundou Marina Tallón.

Neste sentido, Secundino Barreiro, en representación da PAC, subliñou que "a atención que se dá non é a que merece a poboación" ante a falta de medios.

Tamén Escudeiro avisou de que cada vez os médicos que realizan o MIR non optan pola Medicina de Familia porque "as condicións son cada vez máis penosas". Con todo, recalcou que a sanidade está "nove meses" dos doce que ten o ano en "emerxencia permanente", tanto nas cidades galegas como nalgunhas zonas rurais, polo que a plataforma de sindicatos médicos avoga pola "descentralización", xa que "o problema é a dimensión do sistema sanitario".