Por Xurxo Salgado | Silleda | 20/02/2018 | Actualizada ás 22:00
A morte dun raposo, tiroteado presuntamente por cazadores o pasado 20 de xaneiro nos montes de Silleda, pode acabar ante a Fiscalía de Medio Ambiente. O animal apareceu abatido nunha zona vedada á caza, ao carón dunha estrada e cunha lata de sardiñas metida na boca para “denigralo”. A Asociación ambiental e cultural Petón do Lobo denuncia que a Subdirección xeral de Biodiversidade e de Recursos Cinexéticos e Piscícolas da Xunta intenta enganalos tras pedir información sobre este caso.
Esta entidade denunciou o caso ante o Seprona e ante a Xunta. Na resposta que recibiu do Goberno galego, obviase que o raposo apareceu nunha zona prohibida para a caza e que, polo tanto, era preciso que o TECOR correspondente, neste caso o de Silleda, contara coa preceptiva autorización, segundo o Plan Anual de Aproveitamento Cinexético (PAAC). “A Subdirectora xeral de Biodiversidade e de Recursos Cinexéticos e Piscícolas, pretende facer crer que o raposo foi abatido dentro do período normal de caza menor, polo que non era precisa autorización para realizar a batida, cando non é así, posto que por tratarse dunha zona vedada si que era preciso tal autorización segundo o artigo 16 do citado PAAC”, denuncia.
Ademais, esta entidade lembra que, no caso de que a Xunta autorizarse unha batida neste zona --que non foi o caso--, debería xustificar a súa necesidade ao facer referencia ás actuacións de mellora sobre as poboacións cinexéticas reflectidas no Plan anual de aproveitamento cinexético.
PROHIBIDA A SÚA CAZA
Segundo o artigo 2 da resolución do 19 de maio de 2017, da Dirección Xeral de Patrimonio Natural, no que se determinan as épocas hábiles de caza, o período hábil xeral para exercer a caza en Galicia será o comprendido entre os días 15 de outubro de 2017 e o 6 de xaneiro de 2018, ambos inclusive. No artigo 16 da citada norma relativo a “Réximes especiais por especies aprobados despois de oídos os comités provinciais de caza e o Comité Galego de Caza”, determínase que non se poderán realizar batidas de raposo nas zonas vedadas dos tecores desde o 2 de setembro ata o 14 de outubro de 2017, e desde o 7 de xaneiro ata o 11 de febreiro de 2018.
Pero, na resposta dada a Petón de Lobo, a Subdirectora xeral de Biodiversidade e de Recursos Cinexéticos e Piscícolas, Susana Cuesta Fariña, “quere facer crer que a morte do raposo coincidiu coa tempada prevista de caza menor”. Por iso, a entidade entende que, con esta resposta preténdese “burlar a lei de caza e a súa normativa, ninguneando á cidadanía, ás entidades ambientais e traballando en contra da conservación da natureza”.
“LOBBIES DA CAZA”
Ana Varela, secretaria da entidade, anuncia que presentarán unha denuncia ante a Fiscalía, tanto pola aparición deste raposo morto como polas “mentiras” da Xunta. “A Xunta podería estar prevaricando por omisión (a figura delitiva da comisión por omisión), ao intentar enganar intencionadamente á xente que presenta denuncias polos malos tratos que sofre en Galicia a fauna salvaxe, xa que existen indicios de que non é un departamento que conserve á Natureza, senón que desde os seus postos de responsabilidade pública, en vez de cumprir cos seus deberes, parece que se adican a xestionar as amizades das súas axendas persoais e actuar como portavoces dos lobbies da caza en Galicia”, denuncia en declaracións a GC.
De feito, a Xunta destinou, durante 2016 e 2017, máis de 13.000 euros a campionatos de caza de raposo como o celebrado o pasado sábado nos municipios pontevedreses de Forcarei, A Estrada, Cerdedo-Cotobade e Campolameiro
Por outra banda, tamén salienta que a Xunta podería a estar a encubrir as “posibles falcatruadas dos cazadores” ao non publicar os Plans anuais de aproveitamento cinexético (PAAC), que para cada tempada solicitan as sociedades de caza e pesca, na modalidade de batida. “Así os lugares a incluír nas batidas poden ser manipulados por uns e outros segundo lles sexa convinte para eludir as posibles responsabilidades”, engade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.