O BNG pide dar un paso adiante polo dereito a decidir
Os nacionalistas defenden un relatorio que analice unha proposta de marco político que garanta "o dereito a decidir". O PSOE critica esta "porta falsa" cara á reforma estatutaria e o PP defende o nivel de descentralización do Estado. En Marea garante o seu apoio á proposta.
Por E.P. | SANTIAGO DE COMPOSTELA | 20/02/2018 | Actualizada ás 20:41
O grupo parlamentario do BNG defendeu o impulso dun relatorio que analice a elaboración dunha proposta de marco político e institucional na que se garanta o dereito a decidir. Unha iniciativa que suscitou as críticas dos grupos socialista e popular, que arremeteron contra a "forma e o fondo" da proposta do Bloque e que defenderon o funcionamento do modelo vixente.
A deputada e portavoz nacional do BNG, Ana Pontón, defendeu "un gran acordo" que recoñeza a "soberanía" de Galicia e "dote das ferramentas" que permitan mellorar a vida dos cidadáns e "abrir un debate necesario" con "serenidade" como punto de inicio "dunha reflexión conxunta", que "ningún grupo ten dereito a furtar a este país".
Así apelou ás figuras de Castelao e Bóveda para alentar á toma de decisións "cruciais" para as xeracións futuras, ante un Estatuto que actualmente "lle queda estreito" a Galicia e que queda "en papel mollado" fronte un proceso de recentralización política "brutal".
"Temos motivos para estar preocupados", defendeu Pontón, referíndose a que Galicia conta con menos poboación que en 1981, "máis envellecida" e que o país representa o 5,2% do PIB e o 5,5% do emprego do Estado, á vez que o galego é a "única lingua da Península" que perde falantes.
Á marxe disto, Pontón considerou "evidente" que o marco político "condiciona" as posibilidades de desenvolvemento, como se viu "no espolio enerxético" ou os problemas do sector pesqueiro, e que se aproveitou á crise para "roubar dereitos" e "fortalecer o Estado centralista, absolutista" e "baleirar a autonomía financeira".
Por iso, pediu escoller entre a "parálise" e o "impulso político", confiando nas posibilidades de Galicia. "Só queremos romper coa subordinación de Galicia co Estado", defendeu.
"UNHA PORTA FALSA"
O portavoz socialista, Xoaquín Fernández Leiceaga, mostrouse "crítico" tanto por "a forma e o fondo" da iniciativa, defendendo que o marco de autogoberno actual é "posiblemente o máis apoiado do conxunto das comunidades autónomas", incidindo en que unha reforma do texto "non é posible" mediante o medio defendido polo BNG.
"Unha porta falsa para un asunto de calado", criticou, e que require de "consensos previos" entre todos os grupos. "A conclusión é que van de farol", insistiu, acusando o BNG de pensar "en agrupar a súa base social" á conta de "introducir división" entre os grupos da oposición.
Tamén advertiu de que na súa proposta o BNG "non fala de reforma estatutaria" e, con todo, realiza unha avaliación "catastrofista" e "negadora da realidade" do marco constitucional, a través dun "exercicio de desmemoria" e "cegueira".
Así, defendeu que o marco actual é "máis descentralizado que Alemaña" e que "pode ser mellorado" cara a un modelo "máis maduro", aínda que non a través unha proposta "indeterminada" e "rupturista". "Chamo á claridade", reiterou, preguntando ao BNG se con ese novo modelo "queren dicir independencia". "Nós estamos en contra se ese é o obxectivo".
AUTONOMÍA "PLENA"
Tamén se mostrou crítico o portavoz do PP, Pedro Puy, quen ironizou con que non vai aludir a "argumentos de oportunidade" como "o seguidismo" a Cataluña, arremetendo contra o "afán de transcendencia histórica" de Pontón por querer "equipararse a Castelao e Bóveda".
Puy defendeu que o marco xurídico actual obtivo un apoio en referendo en 1978 dun 90,06% de apoio en Galicia, para o que os nacionalistas "pedían o non" ademais da "extrema dereita".
Tamén tachou de "falso" que se consolide o poder centralista, defendendo o apoio ao actual marco estatutario e o impulso a 433 leis a través do autogoberno galego.
Puy defendeu que Galicia conta con autonomía de gasto "plena" e que España supera á media de gasto público "federal" de territorios como Bélxica ou Estados Unidos. Finalmente, asegurou que o PP cre "na democracia, as regras e no poder político limitado, controlado xusto e divisible", que é "o que pensa o pobo galego".
AUTOGOBERNO "LIMITADO"
Desde En Marea, Luís Villares garantiu o seu apoio á proposta, lembrando os 35 anos de autogoberno "limitado" no que é "crucial" introducir a "defensa dos servizos esenciais" ante un Estado lexislativo "inoperante" e o "abandono" do Goberno galego en cuestións como a sanidade ou a ordenación do monte.
Villares defendeu que "o marco importa" e non se pode aceptar "vivir nun país sen competencias" e a acción de goberno "é esencial" para frear o "sufrimento de moita xente" e evitar un estado de opinión "de que non hai futuro".
"Non nos resignamos, plantamos cara e non queremos deixar a ninguén atrás", asegurou. Por iso, defende un autogoberno "con capacidade para mellorar o benestar" cidadán, e que se introduza "unha carta de dereitos sociais" nun novo marco que "faga a xustiza social a característica definitoria" de Galicia.
