SANTIAGO DE COMPOSTELA | 22/02/2018 | Actualizada ás 15:08 por EUROPA PRESS
A eurodeputada galega Lídia Senra (GUE/NGL) denunciou este xoves ante a Comisión Europea o "desbordamento" da balsa de residuos da antiga mina de cobre e ouro producido o xoves 15 de febreiro en Touro, cun escrito no que informa os "danos ambientais" que provocan as "continuas verteduras" que se producen na zona.
Nun comunicado, Senra denunciou que o "desbordamento" da balsa de Bama (Touro), situada a 100 metros do río Brandelos, ao que foron parar os residuos, é "a pinga que colma o vaso", por tratarse de "un claro exemplo de vulneración" da normativa europea.
En concreto, a eurodeputada, referiuse ao incumprimento da directiva referida á "xestión dos residuos das industrias extractivas" (2006/21/CE), e a que advirte sobre a "responsabilidade e reparación de danos ambientais" (2004/35/CE).
Ademais, Senra defendeu que, tanto as empresas responsables da explotación mineira en cuestión, como a Xunta e o Goberno español, están "a vulnerar totalmente" a Directiva Marco da Auga (2000/60/CE), porque "non fan nada fronte á continua contaminación que padecen as canles fluviais da contorna".
Así, incidiu en que se trata de "un problema que transcende o local", e que "vai moito máis alá de Touro", xa que contamina "moitos regatos que van parar ao río Ulla" e que trasladan a contaminación "até a ría de Arousa", onde desemboca, o que afecta os bancos "marisqueiros da costa".
Ante tal situación, Lídia Senra pediu á Comisión Europea que "actúe dunha vez" e adopte as "medidas necesarias" para "comprobar se se está aplicando ben ou non" a normativa da Unión ante un "problema que leva arrastrándose durante décadas".
FIN DE SEMANA DE ACTUACIÓNS CONTRA A MINA
A eurodeputada galega explicou que, "continuando co apoio á loita" da plataforma veciñal 'Mina Touro-O Pino Non', participará este venres de febreiro nun coloquio organizado na Estrada (Pontevedra), baixo o título 'A mina de Touro-O Pino tamén lle afecta á Estrada, no coidado do río Ulla'.
Por outra banda, o domingo Lídia Senra acudirá á manifestación tractorada que convoca a plataforma 'Móvete' da Estrada, e que partirá ás 12,00 horas da antiga balsa mineira de Angumil para terminar no municipio de Touro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.