Un profesor da USC colaborador de empresas mineiras acusa aos medios de “desinformar” en relación á mina de Touro-O Pino
Felipe Macías, catedrático de Edafoloxía e Química Agrícola da Facultade de Bioloxía, negou que teña consecuencias sobre o medio ambiente.
- A megamina de Cobre San Rafael: os mesmos técnicos e as mesmas promesas que en Corcoesto
- Quen está detrás do polémico proxecto mineiro en Touro e O Pino?
Por Galicia Confidencial | Compostela | 27/02/2018 | Actualizada ás 10:00
O pasado mércores a Facultade de Química da USC acolleu unha conferencia baixo o título: “Touro: un novo proxecto de explotación mineira. Consecuencias ambientais”. Moitos dos asistentes agardaban que se falaran das repercusións da mina pero o conferenciante, o profesor de Químicas Felipe Macías Vázquez, “resultou ter un contrato de colaboración con empresas como TEN, fabricante de tecnosoles (tecnoloxía para a recuperación dos terreos danados pola mina), ou Francisco Gómez y CIA e Explotaciones Gallegas, as dúas directamente relacionadas coa explotación da mina”.
Así, o denuncian nun artigo publicado no GC Aberto, a sección destinada a dar voz aos lectores e as asociacións, un estudante desa facultade en nome doutros estudantes que din que, o conferenciante “empregou fotografías de manifestantes contra a mina para mofarse e fixo unha serie de comentarios despectivos e ata insultantes cara xornalistas e medios comunicativos chamando mentiras a datos contrastados, moitos deles incluídos no propio informe sobre o proxecto da empresa”.
