Por Galicia Confidencial | Compostela | 09/03/2018 | Actualizada ás 13:20
Máis dun millón de euros. Ese é o diñeiro que a Xunta destinará o sector da minaría, pero a través dunha nova axuda que non vai a empresas, senón a entidades sen ánimo de lucro. O obxectivo, impulsar “a sustentabilidade, a prevención e a innovación no sector” e prevé que esta nova orde permita desenvolver ao redor de 20 proxectos e mobilizar máis dun millón de euros.
A convocatoria, que se publicará proximamente no Diario Oficial de Galicia (DOG), está dirixida a entidades sen ánimo de lucro con representación no sector mineiro galego que presenten iniciativas que teñan como obxectivo mellorar as prácticas preventivas e ambientais; a transferencia de coñecemento, a investigación e a innovación neste eido; o aproveitamento racional e eficiente dos recursos minerais, ou a divulgación e promoción do sector.
As axudas, que poderán cubrir ata o 80% cun máximo de 100.000 euros por proxecto, tramitaranse por concorrencia competitiva e nos criterios de valoración terase en conta a tipoloxía da actuación -atendendo á finalidade, impacto e carácter innovador, a calidade técnica da proposta, e a difusión de resultados. Cun orzamento final da Xunta para este programa de 889.642 euros, os apoios poderán destinarse a gastos relacionados con recursos humanos, adquisición de equipamentoa e instrumental, custos de investigación contractual e patentes, ou material funxible.
“O desenvolvemento destas iniciativas redundará na mellora do ambiente -grazas a proxectos que terán un menor impacto no contorno- e nunha maior seguridade no desenvolvemento da actividade mineira por parte dos traballadores ao fomentar a prevención en materia de riscos laborais”, xustifica a Xunta esta convocatoria. Estes apoios sumaranse aos realizados nas edicións anteriores, que desde 2012 permitiron o desenvolvemento de 60 proxectos, aos que a Xunta destinou 3,7 millóns de euros.
A Xunta insiste en que o seu obxectivo é “impulsar unha minaría segura e sustentable, capaz de crear máis valor e empregos na Comunidade mantendo todas as garantías urbanísticas, ambientais e técnicas”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.